DILI, 02 agostu 2022 (TATOLI)—Dirijente empreza australianu, GM Milatos Lda hasoru malu ho Primeiru-Ministru (PM), Taur Matan Ruak, hodi ko’alia kona-ba planu prodús besi halo uma iha munisípiu Liquiçá.
“Ami konvoka enkontru ho Primeiru-Ministru, ne’ebé iha fulan kotuk liubá ami trasa ona, ami iha intensaun ida atu mai investe iha Timor, liuliu iha área fábrika tanba ne’e importante tebes presiza halo diskusaun ho Primeiru-Ministru,” Administradór Sosiedade GM Milatos, George Milatos, hateten hafoin hasoru malu ho Xefe Governu, iha Rezidénsia Farol, tersa ne’e.
Notísia relevante: Governu presiza hasa’e produsaun algodaun soru tais
Ba inisiativa ne’e, empreza sei estabelese fábrika iha Liquiçá, hodi prodús besi sira ne’ebé importa hosi rai-li’ur.
“Ami-nia fábrika ne’e prodús besi halo uma nia iha Timor-Leste, fatin ba prodús besi ne’e iha munisípiu Liquiçá,” nia akresenta.
Empreza estranjeiru ne’e sei investe ho orsamentu millaun $3, ne’ebé sei emprega mós timor-oan hamutuk na’in-1.000.
“Provavelmente ami presiza fundu ba produsaun ne’e, konseteza sei envolve timor-oan barak iha fábrika ne’e, tanba ita hotu hatene katak materiál ne’e konserteza katak sei lori mai hosi rai-li’ur, hafoin uza fali iha Timor entaun estimasaun kompañia nian durante tinan-lima nia laran sei presiza forsa ne’ebé sei presiza traballadór timor-oan na’in 1.000,” nia tenik.
Primeiru-Ministru, Taur Matan Ruak, apresia ho investimentu ne’e no kompromete serbisu hamutuk.
Jornalista : Antónia Gusmão
Editora : Julia Chatarina
