BAUCAU, EKONOMIA, HEADLINE, MUNISÍPIU

Estrada Quelicai-Nahareca iha ona prosesu konkursu

Estrada Quelicai-Nahareca iha ona prosesu konkursu

Kondisaun estrada postu administrativu Quelicai, munisípiu Baucau. Imajen espesiál.

BAUCAU, 02 agostu 2022 (TATOLI) – Estrada diresaun Uaiaka, postu administrativu Qeulicai, munisípiu Baucau ba suku Nahareca, postu administrativu Ossu, munisípiu Viqueque iha ona prosesu konkursu no tuir planu sei anunsia rezultadu konstrusaun iha fulan-setembru tinan ne’e.

Diretór Obra Públika Munisípiu Baucau, Pedro Alexandre Guterres Pereira, haktuir, ekipa tékniku rekolla ona dadus durante tinan-rua no iha semana-kotuk kontinua iha faze re-verifikasaun dadus ba uma no ai-horis hosi komunidade ne’ebé iha estrada atu halo kontajen indemnizasaun antes hahú konstrusaun.

“Prosesu ne’e agora iha faze aprovizonamentu konkursu nia-laran, ne’ebé tuir informasaun hosi ministru obra públika, estrada diresaun Quelicai setembru iha ona rezultadu,” Diretór Obra Públika Baucau, inform aba Agência Tatoli, liuhosi telefónika, tersa ne’e.

Estrada diresaun Suku Abafala, postu Quelicai to’o suku Nahareca, postu Ossu, munisípiu Viqueque purvolta kilómetru 28 ne’ebé sei utrapasa besik suku hamutuk 20 munisípiu Baucau no Viqueque no sei utiliza hosi total populasaun rihun 29-resin.

Administradór postu administrativu Quelicai, Mateus Soares Cabral, konsidera kondisaun estrada dirasaun Quelicai, daudaun ne’e difikulta movimentasaun transporte tanba kondisaun aat nune’e autoridade lokál ne’e iha esperansa governu bele fó atensaun atu rezolve iha tempu besik.

Mateus Cabral informa, ekipa tékniku hosi Ministériu Obra Públika nasionál iha semana-kotuk koordena ho autoridade postu realiza re-verifikasaun dadus kona-ba ai-horis no uma komunidade ne’ebé besik iha estrada nune’e bainhira konstrusaun iha intendementu entre komunidade no kompañia.

“Estrada ne’e nesesidade duni atu hadi’a tanba kleur ona, estrada ne’e konsideradu importante tanba liga entre munisípiu Baucau ho Viqueque,” Mateus Soares Cabral hateten.

Notísia relevante: Tempu Besik, Hahú Konstrusaun Estrada Baucau-Viqueque

Jornalista    : Natalino Belo

Editór           : Evaristo Soares Martins

iklan
iklan

Leave a Reply

iklan
error: Content is protected !!