Suku Tirilolo finaliza pagamentu subsídiu idozu-invalidés
BAUCAU, 02 agostu 2022 (TATOLI) – Suku Tirilolo, postu administrativu Baucau Vila, munisípiu Baucau, finaliza ona subsídiu idozu no invalidéz ba benefisiáriu na’in-614.
Xefe suku Tirilolo, Ricardo Ernesto Belo, esplika, benefísiaáiu na’in-614 ne’e simu ona subsídiu iha loron sesta, 21 fulan-jullu komposta hosi aldeia neen hanesan Betulale, Caisido, Lutumutu, Osso-ua, Lialailesu no Parlamentu.
“Sufisienta ka lae ne’e aprova ona hosi estadu, uluk kada pesoál $30, agora aumenta tán $20, ha’u hanoin ne’e bele ona maibé depente ba benefisiáriu sira atu jere iha kada uma-kain,” Xefe suku Tirilolo, ne’e informa ba Tatoli iha Vila Antiga, kuarta ne’e.
Hosi númeru ne’e, iha benefisiáriu na’in-20 kategoria óbitu nune’e tenke reprezenta membru família hafoin prenxe karta deklarasaun óbitu.
Enkuantu benefisiáriu foun hamutuk na’in-20 resin ne’ebé tuir planu sei simu subsídiu iha faze daruak tinan-2022 tanba tenke prenxe dokumentu hanesan kartaun eleitorál no billete identidade (BI).
Tuir kalendariu, pagamentu iha munisípiu Baucau hahú iha loron sesta 07 jullu iha suku Gariuai, postu Baucau Vila no sei termina iha loron 23 setembru iha postu Quelicai.
Totál benefisiáriu faze dahuluk tinan-2022 hamutuk na’in-15.536 no aumenta 862. Hosi númeru antes tinan-2021 hamutuk na’in-14.474.
Jornalista : Natalino Belo
Editór : Evaristo Soares Martins
