BAUCAU, 04 jullu 2022 (TATOLI) – Servisu Munisipál Diresaun Transporte Terrestre Baucau, distribui ona subsídiu kombustível ba transporte públiku hamutuk 339.
Diretór DTT Baucau, Roberto da Cruz, hateten, hosi númeru ne’e transporte públiku ne’ebé rejista hamutuk 449 komposta hosi bís diresaun Baucau-Dili, mikrolet diresaun Baucau vila no angguna diresaun postu administrativu.
“Kada trasnporte públiku hetan subsídiu litru 150 válidu ba fulan-ida, governu planu fulan-tolu maibé agora foin fulan-ida nian,” Diretór DTT Baucau hateten iha Vila Nova, kinta ne’e.
Maske nune’e transporte públiku hamutuk 110 mak seidauk foti subsídiu relasiona ho kondisaun transporte aat no dokumentu balun seidauk kompleta hanesan inspesaun, lisensa no karta kondusaun hosi motorista.
DTT Baucau daudaun ne’e halo monitorizasaun ba trasnporte públiku hotu, liuliu bís diresaun Baucau-Dili relasiona ho lamentasaun pasajeiru kona-ba folin kada ema-ida ne’ebé antes seidauk iha subsídiu selu $5 tanba folin mina sa’e.
Nune’e DTT Baucau husu ba pasajeiru sira atu hato’o keixa direitamente bainhira mosu kobransa latuir folin ne’ebé determina ona ba kada ema-ida selu $4.
“Sei mosu nafatin manipulasaun folin nune’e ami sei hato’o ba nasionál atu fó sansaun,” nia fó hanoin.
Sansaun ne’ebé fó hanesan hapara operasaun, kansela subsídiu inklui karta kondisaun hosi motorista no multa ba transporte mínimu $100 to’o $500.
DTT Baucau husu ba transporte públiku sira atu koopera no kumpre tarefa ba pasajeiru sira bazea ba folin ne’ebé determina ona nune’e fasilita komunidade sira atu utiliza transporte.
Jornalista : Natalino Belo
Editór : Evaristo Soares Martins
