BAUCAU, EDUKASAUN, HEADLINE, MUNISÍPIU

Autoridade suku Soba konsidera PMOPA-PNDS benefísia direta povu

Autoridade suku Soba konsidera PMOPA-PNDS benefísia direta povu

Xefe Suku Soba, Francisca Monica de Jesus Soares. Imajen Tatoli/Natalino Belo.

BAUCAU, 05 jullu 2022 (TATOLI) – Autoridade suku Soba, postu administrativu Laga, konsidera Programa Mão de Obra Postu Administrativu (PMOPA) no Programa Nasionál Dezenvolvimentu Suku (PNDS) benefísia direita ba povu iha baze.

Xefi suku Soba, Francisca Monica de Fatíma Soares, espresa hanoin ne’e tanba durante mandatu nu’udar autoridade suku hosi tinan-2016 to’o agora PMOPA no PNDS mak fó benefísiu direta ba povu.

“Programa rua ne’e kapaas tebes tanba bele halo dezenvolvimentu iha suku, liuliu benefísia direta ba komunidade tanba sira-rasik mak uza hodi hetan osan uitoan hodi ajuda nesesidade família uma-laran,” Xefe suku Soba hateten iha postu Laga, sesta ne’e.

Atividade seluk perfurasaun bee-moos ne’ebé apoia hosi Institutu Petróleu no Jeolojia (IPG, sigla portugés) liuhosi kompañia no sei kontiniua halo melloramentu ba aldeia tolu liuliu aldeia Heuwai no Betufalu no Sawatesi hosi suku Samalari.

Rezultadu perfurasaun sei kontinua kanaliza ba komunidade inklui merkadu komunidade, Igreja no edifísiu estadu iha área Soba.

Autoridade suku submete ona proposta loke estrada ba Institutu Jestaun Ekipamentu (IGE, sigla portugés) ba aldeia Assa-Nunu no Fatiliri ne’ebé tuir planu sei hahú iha fulan-setembru tanba fasilita transportasaun materiál konstrusaun hodi implementa Uma Kbiit La’ek (UKL).

“Iha suku Soba bele dehan programa VIII governu nian dezenvolvimentu lao hela,” Francisca Soares akresenta.

Totál populasaun iha suku Soba hamutuk 2.353 komposta hosi aldeia neen hanesan Bole-há, Assa-Nuno, Butufalo, Fatiliri, Heu-Uai no Laicua, ho totál uma-kain 630-resin.

Jornalista    : Natalino Belo

Editór           : Evaristo Soares Martins

iklan
iklan

Leave a Reply

iklan
error: Content is protected !!