BAUCAU, EKONOMIA, HEADLINE, MUNISÍPIU

Laga lansa PMOPA faze dahuluk

Laga lansa PMOPA faze dahuluk

Prezidente Autoridade Munisipál Baucau, Olívio 'Bou-Lesa' Freitas, akompaña hosi Komandante PNTL Baucau, Superintendente António de Sá no administradór postu administrativu Laga, Domingos Loyola Perreira, tesi fita bainhira lansa PMOPA iha postu Laga, sesta (05/08). Imajen Tatoli/Natalino Belo.

BAUCAU, 05 jullu 2022 (TATOLI) – Postu administrativu Laga, munisípiu Baucau, hahú lansa Programa Mão de Obra Postu Administrativu (POMPA) faze dahuluk ho atividade hamutuk 51.

Administradór postu administrativu Laga, Domingos Loyola Pereira, esplika, atividade PMOPA hamutuk 51 ne’ebé iha faze dahuluk hahú ho atividade 11 kada suku atividade rua, fahe ba grupu rua ho traballadór kada grupu na’in-20, hosi totál suku ualu iha postu Laga.

“Atividade ne’e importante tanba governu aloka orsamentu atu rekupera ekonomia populasaun sira, sira rasik mak halao kna’ar nu’udar na’in ba atividade no sei hetan osan oituan ba nesesidade uma-laran,” Administradór postu administrativu Laga hateten iha Laga, sesta ne’e.

Atividade ne’ebé implementa hanesan kuda ai-oan, reparasaun estrada no reabilitasaun eskola ki’ik no limpeza jerál ne’ebé hahú ohin ne’ebé faze dahuluk utiliza uluk 50% hosi totál orsamentu hamutuk $13.470,50.

Bainhira faze dahuluk finaliza ona sei halo relatóriu atividade nune’e kontinua ba faze daruak ne’ebé tuir planu sei finaliza iha fulan-novembru.

Kada atividade sei responsável hosi grupu ida hosi totál membru kada grupu na’in-20 ne’ebé kada loron traballadór ida sei hetan $5 hosi total durasaun loron serbisu 20.

“Importante traballadór sira serbisu ho di’ak, maske osan ki’ik maibé ne’e responsabilidade nu’udar sidadaun postu Laga nian,” Domingos Loyola Pereira akresenta.

Prezidente Autoridade Munisípiu Baucau, Olívio ‘Bou-Lesa’ Freitas hateten lansamentu PMOPA ne’ebé iha ona nota akordu nune’e aloka ona orsamentu 50% hodi implementa atividade faze dahuluk nian.

“Bainhira faze dahuluk aselara lalais, halo relatóriu husu pedidu atu kontinua ba faze daruak,” Bou-Lesa hateten.

VIII governu liuhosi Ministériu Administrasaun Estatál (MAE) implementa programa refere ho objetivu atu mobiliza komunidade hamutuk koopera ho espíritu nasionalismu no kontribui iha rai-rasik hodi hala’o atividade iha postu to’o suku hodi rekupera ekonomia uma-laran.

Munisípiu Baucau, postu administrativu Laga no Venilale mak hahú lansa ona PMOPA, enkuantu hela postu haat seluk hanesan Baucau Vila, Vemasse, Quelicai no Baguia mak seidauk tanba presiza kompleta rekizitu.

Jornalista    : Natalino Belo

Editór           : Evaristo Soares Martins

iklan
iklan

Leave a Reply

iklan
error: Content is protected !!