PM Taur husu família militár Koreia na’in-lima vizita bebeik Timor-Leste

DILI, 08 agostu 2022 (TATOLI)—Embaixadór Koreia iha Timor-Leste, Kim Jeong Ho, lori família militár Koreia na’in-lima hasoru malu ho Primeiru-Ministru (PM), Taur Matan Ruak, no iha biban ne’e Xefe Governu husu ba família atu vizita bebeik Timor-Leste.
“Primeiru-Ministru haksolok no triste, tanba ne’e maka hakuak família sira ne’e hodi informa ba sira katak Timor-Leste ne’e imi-nia rain mós tanba imi-nia oan, kaben, maun-alin mate iha rai ne’e. Tanba ne’e husu ba imi bainhira de’it bele mai fali Timor, ami prontu simu no hanoin katak Timor hanesan imi-nia rain,” Embaixadór Koreia iha Timor-Leste, Kim Jeong Ho, hateten bainhira lori família militár koreia na’in-lima hasoru Primeiru-Ministru, iha Palásiu Governu, segunda ne’e.
Notísia relevante: PR Horta atribui medalla méritu ba militár Korea na’in-lima mate iha RAEOA
Primeiru-Ministru momentu ne’ebá nu’udar Xefe Estadu Maiór FALINTIL-Forsa Defeza Timor-Leste (F-FDTL) tanba ne’e koñese di’ak tebes matebian sira.
“Ha’u lori família hosi matebian soldadu Koreia na’in-lima ne’ebé mak mate iha tinan 2003, momentu ne’ebá Primeiru-Ministru hanesan Xefe Estadu Maiór F-FDTL, ne’ebé koñese di’ak soldadu sira ne’e. Tanba ne’e mak ha’u lori sira-nia família mai komprimenta Primeiru-Ministru,” nia akresenta.
Kona-ba, Sarjentu ida nia mate isin mak la hetan to’o agora, família no Embaixada ko’alia ona ho autoridade Rejiaun Administrativa Espesiál Oé-cusse Ambeno (RAEOA), Prezidente Repúblika no Primeiru-Ministru katak sira iha interese no sei esforsu atu buka tuir mate-isin.
Diplomata ne’e dehan, família sira orgullu tanba Timor-Leste bele rekoñese sira-nia oan.
“Hanesan Embaixadór Koreia iha Timor-Leste ne’ebé reprezenta Estadu Koreia, hakarak hato’o agradesimentu boot ba Prezidente Repúbklika, Primeiru-Ministru, liuliu povu Timor-Leste tomak tanba nafatin hanoin militár na’in-lima ninia dedikasaun ba rai ida-ne’e no Estadu Koreia hakarak halo amigu di’ak ho Timor-Leste no promete katak ba oin Koreia sei apoia nafatin Timor-Leste ba moris di’ak,” nia subliña.
Militár nain-lima ne’e hanesan Sarjentu Hee Choi, Sarjentu Jeonjoong Kim, Sarjentu Jonghoon Baek, Tenente Koronel Jinkyu Park, no Tenente Koronel Byungjo Min.
Jornalista : António Gusmão
Editora : Julia Chatarina

