BAUCAU, 09 juñu 2022 (TATOLI) – Autoridade postu administrativu Vemasse sei implementa atividade 64 liuhosi Programa Mão de Obra Postu Admistrativu (PMOPA) iha suku hitu.
Administradór postu administrativu Vemasse, Pedro da Costa Freitas, esplika, hosi totál atividade POMPA, faze dahuluk sei hahú ho atividade 32 ne’ebé sei envolve traballadór hamutuk rihun-ida resin ho durasaun kontratu loron-20.
“Programa ne’e kapas, benefísiu direta ba povu tanba sira rasik mak partisipa iha atividade,” nia ko’alia iha administrasaun postu Vemasse, segunda ne’e.
Autoridade postu sei deside loron implementasaun PMOPA liuhosi reuniaun asembleia postu ne’ebé envolve xefe suku hotu no sei kontinua ho pedidu orsamentu ba autoridade administrasaun munisipál Baucau hodi implementa faze dahuluk iha fulan-agostu.
Atividade ne’ebé implementa hanesan limpeza jerál tuir dalan publiku, reparasaun estrada no reabilitasaun eskola kiik, ne’ebé utiliza uluk 50% iha faze dahuluk hosi totál orsamentu hamutuk rihun $137,33 no sei remata iha fulan-novembru.
Traballadór ne’ebé envolve iha atividade 64 iha postu Vemasse hamutuk rihun-ida resin, ne’ebé fahe ba grupu ho kontratu kada loron no traballadór ida sei hetan osan $5.
Tuir dadus monografia tinan-2021, totál populasaun iha postu Vemasse hamutuk na’in-14.306 hosi suku hitu kompostu suku Caicua, Loilubo, Ossouala, Ostico, Uaigae, Uatolari no Vemasse.
Jornalista : Natalino Belo
Editór : Evaristo Soares Martins