HEADLINE, SAÚDE

Maiu to’o jullu, HNGV fó tratamentu médiku ba veteranu 1.393

Maiu to’o jullu, HNGV fó tratamentu médiku ba veteranu 1.393

Hospital Nasionál Gidu Valadares (HNGV). Imajen Tatoli/Francisco Sony

DILI, 11 agostu 2022 (TATOLI)— Hahú hosi fulan-maiu to’o jullu, Hospitál Nasionál Guido Valadares (HNGV), konsege fó tratamentu saúde ba veteranu na’in-1.393 hosi territóriu Timor-Leste.

Koordenadór Ekipa Saúde iha Klínika Veteranu HNGV, Eugénio Soares,hateten vetenaru sira ne’ebé médiku espesialista fó asisténsia saúde ne’e maioria moras hipertensaun, moras ruin, estomógu no rins, kardiovaskular, kankru inklui moras bainbain hanesan ferik no katuas nian.

“Veteranu sira ne’ebé mak ita konsulta ne’e la’ós hotu-hotu, maibé balun ne’ebé mak moras baixa iha HNGV no balun konsulta externa hosi médiku sira,” Koordenadór Ekipa Saúde Veteranu HNGV ne’e hateten ba jornalista sira iha HNGV-Bidau, kinta ne’e.

HNGV fó asisténsia saúde liuhosi Médiku Espesiálista sira ba Veteranu-sira ne’ebe dook hosi sentru saúde no balun hetan ona tratamentu, maibé kontinua konsulta.

Tuir dadus, hahú hosi janeiru to’o agostu,halo ona transfere  ba veteranu na’in-44 ba tratamentu médiku iha rai li’ur, hosi númeru ne’e veteranu na’in-ida mak mate tanba moras komplikasaun.

“Veteranu ne’ebé hakarak mai konsulta iha klínika veteranu HNGV presiza lori kartaun eleitorál no visa veteranu ne’ebé mak rejista ona iha baze dadus no aprovadu ona hosi Ministériu Asuntu Kombatente Libertasaun Nasionál,” nia afirma.

Tanba, Ministériu Saúde estabelese ona Klínika Konsulta Veteranu iha Hopsitál Nasionál Guido Valadares ne’ebé kompleta ho médiku espesialista, Enfermeiru, ekipamentu médiku no medikamentu hodi fó atendimentu ba veteranu sira.

Jornalista : Felicidade Ximenes

Editór         : Florencio Miranda Ximenes

iklan
iklan

Leave a Reply

iklan
error: Content is protected !!