DILI, 12 agostu 2022 (TATOLI)—Governu Austrália liuhusi CARE Internasionál iha Timor Leste entrega ekipamentu eletróniku no solar panel ba Ministériu Saúde.
Diretór País CARE Internasionál iha Timor Leste, Peter Goodfellow, hateten ekipamentu ne’ebé mak Care ineternasionál apoia ba Ministériu Saúde mak hanesan laptop unidade lima, mákina imprime rua , Megaphone toa neen, solar panel neen, projector rua no screen projector rua.
Alende, Care Internasionál mós entrega ekipamentu ijiene hamutuk 2,300 ba Ministériu saúde.
“Ekipamentu ijiene uma laran ne’e sei distribui ba uma-kain vuneravel sira hanesan parte ida hosi programa vasinasaun no ekipamentus eskritóriu sei uza atu suporta fornesimentu servisu saúde iha área remota,” Peter Goodfellow hateten hafoin entrega ekipamentu hirak ne’e iha Caicoli, sesta ne’e.
Iha biban hanesan, Ministra Saúde, Odete Maria Freitas Belo, hateten ho apoiu Care Internasionál nian bele ajuda Ministériu Saúde nia servisu to’o iha área rural sira.
“Solar panel ne’ebé mak parseiru CARE internasionál apoiu ita sei uza ba fasilidade saúde hanesan postu Administrativu Atsabe-Munisípiu Ermera no fatin seluk iha área rurál ne’ebé mak seidauk iha eletrisidade,” nia afirma.
Nune’e, Governante ne’e hato’o agradesementu wain ba CARE Internasionál nia apoia liuliu ekipasmentu ne’ebé tulun tebes atu mellora atendimentu saúde ba sidadaun hotu.
Jornalista : Felicidade Ximenes
Editór : Florencio Miranda Ximenes
