DESPORTU, DILI, HEADLINE

MAPKOMS sei koordena ETO Telco ho RTTL transmite direta kopa mundiál

MAPKOMS sei koordena ETO Telco ho RTTL transmite direta kopa mundiál

Ministru Asuntu Parlamentár no Komunikasaun Sosiál, Francisco Martins da Costa Pereira Jerónimo. Imajen Tatoli/Francisco Sony

DILI, 12 agostu 2022 (TATOLI)— Ministru Asuntu Parlamentar no Komunikasaun Sosiál (MAPKOMS), Francisco Martins da Costa Perreira Jerónimo, hateten nia-parte sei hala’o koordenasaun ho empreza ETO Telco ho Rádio Televizaun Timor-Leste, Empreza Públika (RTTL,E.P) hodi haree oinsá bele servisu hamutuk atu transmite direta jogu kopa mundiál 2022, ne’ebé realiza iha Qatar 2022, atu populasaun iha territóriu nasionál bele akompaña.

“Ida ne’e buat tékniku, ami sei koordena ho RTTL, E.P no ko’alia mós ho empreza ETO Telco oinsá atu haree ba ida ne’e. Tanba ETO Telco mak iha direitu atu halo transmisaun, maibé tenke koordena didiak para transmisaun ne’e bele kobre iha Timor laran tomak,” Ministru Jeronimo hateten ba Agência TATOLI, iha muzeu rezisténsia, kinta ne’e.

Notísia relevante:  ETO Telco sei transmite direta kopa mundiál iha Qatar

Empreza ETO Telco mak iha direitu absoluta transmite direta tanba sai manán na’in ba konkursu direitu eskluzivu ofisiál broadcasting kopa mundiál Qatar 2022 iha Timor-Leste.

ETO Telco sei transmite liuhosi plataforma hanesan, ho direitu eskluzivu free to air ka la selu liuhosi kanál no frekuénsia UHF ho kobertura ba Munisípiu 12 inklui Rejiaun Administrativu Espesiál Óe-cusse no Ambeno (RAEOA).

Alende ne’e, iha mós direitu eskluzivu iha televizaun pur asinatura ou play TV ka prepagu liuhosi transmisaun dijitál territoriál ho receiver ETO Telco, espesiál ba Munisipiu Dili, direitu eskluzivu internet streaming liuhosi plataforma TV-Timor ba territóriu Timor-Leste.

Transmisaun ne’ebé ETO halo hetan mós suporta másimu hosi patrosinadór Gota Timor-Leste, empreza bebida ne’ebé ho kualidade di’ak iha Timor-Leste.

Jogu ba kopa mundial sei hala’o iha Qatar hahú iha 21 novembru to’o 18 dezembru tinan ne’e.

Nasaun hamutuk 31 iha mundu mak sei partisipa iha kopa mundial ne’e fahe ba grupu ualu hosi A-H no grupu A mak hanesan, Qatar, Ecuador, Senegal, Netherlands.

Grupu B, Inglaterra, Iran, Estadu Unidu America (EUA) no Wales. Grupu C mak hanesan, Argentina, Saudi-Arabia, Mexico no Polandia.

Grupu D mak hanesan, Fransa, Austrália, Denmark no Tunisia. Grupu E mak hanesan, España, Costarika, Jerman no Japaun.

Grupu F mak hanesan, Belgia, Canada, Marocco no Croasia. Grupu G mak hanesan, Brazil, Serebia, Switzerland no Cameroon. Grupu H mak hanesan, Portugal, Ghana, Uruguay no Korea Súl.

Jornalista: Hortencio Sanchez

Editór     :  Florencio Miranda Ximenes

iklan
iklan

Leave a Reply

iklan
error: Content is protected !!