iklan

EKONOMIA, BAUCAU, HEADLINE, MUNISÍPIU

Baucau harii asosiasaun vendedór

Baucau harii asosiasaun vendedór

Negosiante merkadu Baucau harii asosiasaun vendedór munisípiu Baucau, iha salaun apuramentu Vila Nova, kuarta (16/08). Imajen Tatoli/Natalino Belo.

BAUCAU, 16 agostu 2022 (TATOLI) – Negosiantes kiik hamutuk na’in-899 estabelese asosiasaun vendedór munisípiu Baucau hodi akumula hamutuk hanoin iha vida ekonomia.

Prezidente Kámara Komérsiu Indústria Timor-Leste (CCI-TL, sigla portugés) Munisípiu Baucau, Estanislau Maria Quintas da Costa, esplika, objetivu establesementu asosiasaun refere atu fasilita vendedór sira iha futuru hodi asesu ba kapasitasaun, liuliu jestaun negósiu.

“Durante ne’e idak-idak iha nia fatin maibé ho hanoin ida katak sei halibur hamutuk vendedór iha fatin ida-de’it tanba ne’e mak presiza harii asosiasaun ida nune’e akumula sira-nia hanoin no preokupasaun liuhosi asosiasaun,” Prezidente CCI-TL Baucau ne’e informa ba Tatoli iha Vila nova, kuarta ne’e.

Funsaun harii asosiasaun mak sei akumula preokupasaun ne’ebé durante ne’e vendedór sira hasoru tanba instituisaun governu no NGO sira sei labele atende bainhira iha problema individuál nune’e ho establesementu asosiasaun, maske iha problema pesóal maibe reprezenta ona hosi grupu.

Asosiasaun refere inisiativa hosi vendedór sira hotu iha Baucau nune’e bele akumula hanoin ne’ebé sei hato’o ba institusaun relevante sira hanesan futuru bele tulun iha área kapasitasaun negósiu iha Baucau.

“La pursentu 100 atu rezolve maibé neineik ba neineik la’o tanba asosiasaun ne’e foun,” Estanislau da Costa akresenta.

Maske seidauk iha esperiénsia iha organizasaun maibé ho estabelesementu asosiasaun liuhosi estrutura no regulamentu internu sei hetan kapasitasaun hosi parseiru sira hanesan UN Women liuhosi kooperasaun.

Planu kapasitasaun refere sei foka uluk ba koñesimentu organizasaun ba etrutura no nia membru sira nune’e bele jere mákina iha organizasaun.

Asosiasaun vendedór Baucau sei fó importánsia ba negosiante feto ne’ebé durante ne’e halao vida negósiu iha merkadu munisipál Baucau, tantu vila antiga no vila nova.

Hafoin asosiasaun refere estabelese, autoridade munisipál sei muda vendedór sira ba merkadu foun Tuanau, Vila Nova ne’ebé dadaun ne’e finaliza ona konstrusaun moru no sei kontinua instala saneamentu no bee-moos inklui fasilidade seluk.

Autoridade Munisipál Baucau rasik iha akordu ho UN-Women ne’ebé kolabora ho To’os Ba Moris Diak (TOMAK) kona-ba kriasaun merkadu saudável ho durasaun serbisu hamutuk tinan-haat hahú hosi 2021-2024, ho objetivu kriasaun merkadu no espasu públiku ne’ebé seguru.

Totál vendedór ne’ebé hala’o vida negósiu iha merkadu Baucau hamutuk na’in-898 mak sei involve iha asosiasaun vendedór merkadu Baucau ne’ebé sei envolve negosiante ambulante hosi suku no postu administrativu sira liuhosi tipu negósiu hamutuk 12.

Jornalista    : Natalino Belo

Editór           : Evaristo Soares Martins

iklan
iklan

Leave a Reply

iklan
error: Content is protected !!