Top

Komisáriu Faustino: presiza ajusta lei kombate tráfiku-konsumu ilísitu ba droga hodi reforsa mekanizmu kontrolu

Komandante Jerál PNTL, Komisáriu Faustino da Costa. Imajen TATOLI/Francisco Sony

DILI,16 agostu 2022 (TATOLI)— Komandante Jerál Polísia Nasionál Timor-Leste, Komisáriu Faustino da Costa, hateten presiza entidade hotu hamutuk liuliu Parlamentu Nasionál halo ajustamentu ka lei komplementár balun ba lei númeru 2/2017, 25 janeiru, kona-ba kombate tráfiku no konsumu ilísitu ba droga, nune’e bele haforsa lejizlasaun ne’e atu ba futuru bele kombate krime ilísitu droga iha Timor-Leste.

“Ha’u ko’alia frankamente iha tinan hirak ba kotuk ita komesa rejista krime ilísitu ba droga iha ita nia rai no ema balun uluk dehan Timor-Leste bele sai fatin tránzitu ba droga. Nune’e preokupasaun ami nian nu’udar autoridade seguransa, se ita la ajusta ho lei komplemetár balun atubele reforsa lei númeru 2/2017, 25 janeiru, ho nia mekanizmu kontrolu sira ba futuru Timor -Leste sai fatin konsumu no fatin prodús ba droga,” Komandante Jerál PNTL ne’e,  hateten iha seremónia aniversáriu Unidade Espesiál Polisia (UEP) da-13 iha Bairru-Pité,tersa ne’e.

Notísia relevante: Laiha faktu sufisiente, TDD aplika TIR ba arguidu nain-sia ba kazu ilísitu droga

Komisáriu Faustino dehan lei númeru 2/2017, 25 janeiru ne’e sai bareira ba instituisaun hanesan Polísia Nasionál Timor-Leste liuliu Polisia Servisu Investigasaun Kriminál (PNSIK) atu hala’o nia serbisu investigasaun. Tanb iha lei númeru 2/2017,  fó kompeténsia ba Polísia Siéntifika Investigasaun Kriminál (PCIC, sigla portugés) mak atende kazu droga.

Maibé, iha lei refere mós mensiona Polisia Nasionál Timor-Leste (PNTL) no Ministériu sira seluk atu toma responsavél halo diseminasaun ba lei ne’e.  Tanba ne’e presiza iha ajustamentu balun, nune’e autoridade seguransa hotu hamutuk prevene krime ilísitu ba droga iha Timor-Leste.

Atu kombate droga iha Timor-Leste, nia dehan ba oin PNTL sei estabelese ka instala mákina Sinotex iha fronteira, maibé sei hein Prezidente Repúblika promulga lei orgánika PNTL nian.

Nia dehan, Ekipa operasionál ba mákina ne’e sei serbisu hamutuk ho Postu Integradu Unidade Patrollamentu Fronteira (UPF) hodi kontrola atividade tranzasaun droga iha Timor-Leste liuliu iha fronteira.

“Daudaun ami sei esforsu halo koperasaun ho parseiru PNTL nian, hodi apoia ita fasilidade ba estabelesimentu unidade Sinotex, tanba Unidade Sinotex hanesan ekipamentu ne’ebé bele deteta explosaun arma, dokumentu falsu no deteksaun droga,” nia akresenta.

Komandu Jerál PNTL mós prepara ona rekursu no haruka ona ofisiál nain-rua ba tuir formasaun iha Austrália no Portugál atu halo operasaun ba mákina Sinotex ne’e.

Kona-ba arguidu sira hetan ba ilísitu ba droga hetan Termu Indetidade Rezidénsia (TIR), Komisáriu Faustino dehan PNTL la’os nain ba prosesu, maibé na’in ba prosesu maka Ministériu Públiku ka Prokuradór Jerál.

“Ita nia lei maka dehan nune’e ha’u labele ko’alia ba iha Tribunál nia desizaun, tanba halo detensaun ba droga ne’e ekipa konjunta,” nia afirma.

Iha fatin hanesan, Prezidente Komisaun B iha Parlamentu Nasionál ne’ebé trata ba asuntu Defeza, Seguransa no Negosiu Estrajeiru, José Agostino Siqueira ‘Somotxo’, hateten, nia parte konkorda atu halo ajustamentu ba lei númeru 2/2017, 25 janeiru kona-ba kombate tráfiku no konsumu ilísitu ba droga.

“Maibé ida ne’e depende ba iha Parlamentu nia haree karik nesesáriu atu halo, ami komisaun B prontu atu fó apoiu,”nia kompromete.

Notísia relevante:Kazu droga, membru PN preokupa TDD aplika TIR ba arguidu na’in-sia

Jornalista: Natalino Costa

Editór        : Florencio Miranda Ximenes

Publisidade

Leave a Reply

Latest Post

error: Content is protected !!