iklan

EKONOMIA, BAUCAU, HEADLINE, MUNISÍPIU

Merkadu Munisipál Baucau sei funsiona iha 2024

Merkadu Munisipál Baucau sei funsiona iha 2024

Sekretáriu Munisípiu Baucau, Simão dos Santos Marques Pinheiro. Imajen Tatoli/Natalino Belo.

BAUCAU, 17 agostu 2022 (TATOLI) – Autoridade admistradaun munisipál Baucau tuir planu sei realoka vendedór sira ba merkadu Tuanau, munisipál Baucau iha tinan 2024 hafoin finaliza konstrusaun hodi kompleta fasilidade.

Sekretáriu Munisípiu Baucau, Simão dos Santos Marques Pinheiro, esplika, razaun seidauk realoka vendedór sira tanba Ministériu Turizmu, Komérsiu no Indústria (MTKI) daudaun ne’e finaliza ona levantamentu dadus hodi kontinua projetu konstrusaun iha merkadu refere.

“Ita iha mudansa oituan, tinan ne’e la konsege halo realokasaun tanba iha fali ona prosesu konstrusaun hosi Ministériu Turizmu, Komérsiu no Indústria (MTKI) mak prevee osan ho versaun tipu merkadu munisipál,” Sekretáriu Munisípiu Baucau informa ba Agênsia TATOLI iha Vila Nova, kuarta ne’e.

Merkadu Tuanau sei kontinua konstrusaun hodi moderniza ho tipu merkadu munisipál hanesan kria espasu ba ema ho defisiénsia sira inklui fasilidade fatin fa’an sasán tuir tipu negósiu, saneamentu no bee-moos.

Tuir planu hafoin finaliza konstrusaun, vendedór hamutuk 898 mak sei realoka kompostu hosi merkadu atuál iha vila Antiga no Vila Nova tuir tipu negósiu nune’e bele organizadu iha kada blok hodi kontrola kualidade merkadu saudável no ambiente ijiene.

“2023 ou 2024 ita bele halo realokasaun ona vendedór sira ba merkadu foun,” Simão Pinheiro akresenta.

Bainhira merkadu refere funsiona iha futuru sei kontribui reseita ba autoridade munisipál tanba atividade fa’an no sosa entre vendedór no kompradór hamosu tranzaksaun ekonomia iha Baucau.

Merkadu Tuanau rasik hahú konstrusaun iha tinan-2016 ho ektare ualu no kontinua konstrusaun moru haleu iha tinan 2021, iha uma ba fa’an sasán hamutuk unidade neen no tipu negósiu hamutuk 12.

Jornalista    : Natalino Belo 

Editór          : Evaristo Soares Martins

iklan
iklan

Leave a Reply

iklan
error: Content is protected !!