Top

MP alega arguidu na’in-rua ho medida prizaun preventiva

Edifísiu Tribunál Distritál Dili iha Colmera. Imajen Tatoli/António Daciparu

DILI, 21 agustu 2022 (TATOLI) – Tribunál Distritál Dili (TDD), domingu ne’e liuhosi interrogatóriu dahuluk ba arguidu na’in-rua ho insiál NC no P tanba iha indísiu relasaun ho arguidu nai’n-sia ne’ebé maka antes ne’e envolve iha kazu droga.

Antes ne’e Polísia Sientífika Investigasaun Kriminál (PCIC, sigla portugés), hamutuk ho ekipa konjunta Servisu Nasionál Intelijénsia (SNI), Servisu Informasaun Polísia (SIP) no Servisu Informasaun Militár (SIM/J2) kinta ne’e (18/8) ezekuta mandadu tribunál halo tán detensaun apreensaun no buska domisiliáriu  ba  arguidu sira hanesan NC, CB no P iha área Bidau, Delta no Maloa tanba arguidu hirak-ne’e iha relasaun ho arguidu na’in-sia ne’ebé maka komete krime ilísitu ba droga.

Iha prosesu detensaun apreensaun no buska domisiliáriu ne’ebé  ekipa konjunta hamutuk ho PCIC deteta evidénsia balun iha buska ne’e, nune’e ekipa konjunta asegura kedas.

Iha prosesu detensaun apreensaun no buska domisiliáriu ne’ebé ekipa hamutuk ho PCIC konsege detein suspeitu na’in-rua ho inisiál NC no OP, enkuantu CB rasik iha hela rai-li’ur (Austrália). Nune’e ekipa hamutuk PCIC la konsege halo detensaun.

Nune’e arguidu sira koopera ho ekipa kinjunta nune’e PCIC lori ba detein iha sela PCIC iha Caicoli durante oras 72 antes submete ba interrogatóriu dahuluk iha  Tribunál  Distritál Dili (TDD).

Iha sala julgamentu, Ministériu Públiku alega arguidu sira ho krime tráfiku ba droga ne’ebé previstu iha ártigu 7 lei konsumu ilísitu droga.

Ministeriu Públiku alega arguidu na’in-rua ho medida prizaun preventiva, tanba arguidu na’in-rua ne’e iha indísiu forte no relasaun ho arguidu na’in-sia ne’ebé maka antes ne’e envolve iha kazu droga.

“Iha interrogatóriu dahuluk ohin ne’e, arguidu na’in-rua konfesa ba tribunál  katak, sira na’in-rua ne’e nein koñese malu ho sira na’in-sia ne’e no na’in-rua mós deklara katak, la konsumu droga. Bainhira ekipa konjunta ba halo detensaun, buka no domisiliáiu sira hakfodak,” Defensór Públiku, Humberto Alves ne’ebé fó asisténsia legál ba arguidu na’in-rua ko’alia TDD.

Defeza hosi arguidu na’in-rua ne’e husu tribunál aplika Termu Identidade Rezidénsia (TIR), ho razaun  arguidu na’in-sia no arguidu na’in rua ne’e nein koñese malu.

“No bazea ba relatóriu katak entrega arguidu na’in-rua ne’e deskonfia konsumu bainhira halo teste urina rezutadu la identifika arguidu ne’e konsumu, tanba ne’e ha’u hanesan parte defeza ba arguidu na’in-rua husu tribunál aplika medida koasaun TIR ba arguidu na’in-rua tanba faktu la komprova,” Defensór Públiku Humberto Alves informa.

Nia dehan, tuir loloos Ministériu Públiku la presiza husu ba tribunál hasai mandadu  detensaun, apreensaun no buska hodi lori arguidu sira to’o mai halo interrogatóriu dauluk iha TDD.

“Loloos ne’e Ministériu Públiku aprofunda investigasaun nune’e identika ida-ne’ebé nu’udar  autór prinsipál ba trafikante nune’e Ministériu Públiku promove nia lori mai tribunál hodi halo prosesu sumáriu ba nia,” Defensór Públiku Humberto Alves hateten.

Audiénsia julgamentu ne’e prezide husi Juiz  Evangelino Belo, Ministériu Públiku reprezenta hosi Prokuradór Rogério Viegas, arguidu sira hetan asisténsia legál hosi Defensór Públiku Humberto Alves no advogadu privadu ida.

Notisia relevante: MP prepara rekursu kontra desizaun TDD ba kazu tráfiku no ilísitu droga

Jornalista : Natalino Costa

Editór         : Evaristo Soares Martins 

Publisidade

Leave a Reply

Latest Post

error: Content is protected !!