DILI, 22 agostu 2022 (TATOLI)—Diretór Jerál Viettel Telemor, Tran Van Bang, hateten Telemor kompleta ninia ezisténsia tinan 10 ona iha Timor-Leste no promete ba oin sei kontinua dezenvolve setór telekomunikasaun hodi moderniza no dijitaliza liután.
Notísia Relevante: PR apresia investimentu Telemor iha Timor-Leste
“Telemor nia kontribuisaun ba dezenvolvimentu nasaun Timor-Leste iha setór telekomunikasaun tinan 10 ne’e haree liu kona-ba mobile service, tanba antes ne’e operadór ida ka rua de’it, nune’e ho Telemor nia prezensa ho presu tun no ema barak mak uza liu mobile service. Durante ne’e Telemor aumenta teknolójia, 2G, 3G, 4G, no mós 4G+ no daudaun iha prosesu implementasaun ba modernizasaun no dijitalizasaun atu bele atinji 5G tuir espetativa públiku ninian,” Diretór Jerál Viettel Telemor, Tran Van Bang, hateten ba jornalista sira hafoin ramata enkontru ho Prezidente Repúblika, José Ramos Horta, iha Palásiu Prezidensiál Nicolau Lobato, Bairru Pite, segunda ne’e.
Diretór Jerál Viettel Telemor ne’e sente kontente tebes hala’o enkontru ho Xefe Estadu, José Ramos Horta, tanba delegasaun hosi viettel group Vietname ne’e, PR simu di’ak.
Durante sormutu, Telemor partila ninian estratéjia ba futuru kona-ba sosiedade dijitál.
Aleinde ne’e, drijente ne’e rekuiñese liña internet tuir kliente sira-nia preokupasaun boot katak la’o ladún di’ak no parte Telemor promete sei mellora liután iha futuru.
“Telemor agora koopera hela ho empreza boot iha mundu, hanesan Google, Facebook hodi halo rekuperasaun ba liña internet, atu nune’e iha futuru mai bainhira kabu submarinu tama buat hotu la’o di’ak,” nia promote.
Daudaun ne’e, Telemor monta ona tore rede internet hamutuk 200 ne’ebé kobre iha territóriu nasionál.
Diretór Jerál Viettel Telemor ne’e hateten, iha área rurál daudaun Telemor rekuiñese kliente barak sei enfrenta difikuldade liña internet no hein bainhira kabu submarinu to’o mai Timor-Leste, Telemor sei bele fornese servisu ne’ebé di’ak liutan iha internet ninian.
Enkuantu, daudaun ne’e Telemor iha funsionáriu hamutuk na’in-240, no funsionáriu hirak ne’e 90% mesak timoroan.
Notísia Relevante: PN kestiona rede internet Timor Telecom-Telemor
Jornalista : Nelson de Sousa
Editór : Cancio Ximenes
