DSEMD husu okupante hamamuk resintu eskola sia iha Dili

DILI, 23 agostu 2022 (TATOLI)–Diretór Servisu Edukasaun Munisípiu Dili (DSEMD), Carlito da Silva, husu ba profesór no família uma-kain 53 ne’ebé kontinua okupa hela resintu eskola sia iha Dili atu hamamuk no fó fatin ba Governu atu hala’o prosesu dezenvolvimentu.
“Ha’u husu ba profesór sira nu’udar ativista ne’ebé hela iha área eskola sira, hirak ne’ebé mak la’ós partense ba ita-boot sira-nia rasik, tenke kompreende hodi fó fatin ba Governu atu halo prosesu dezenvolvimentu ba konstrusaun no reabilitasaun,” Diretór informa iha ninia knaar fatin, Comoro, tersa ne’e.
Munisípiu Dili iha eskola hamutuk 223, ne’ebé sei identifika hela eskola internasionál rua seluk.
“Hosi eskola sira ne’e, iha eskola balun kontinua hasoru difikuldade ba prosesu reabilitasaun no konstrusaun tanba komunidade okupa hela fasilidade eskola,” nia akresenta.
Notísia relevante: MEJD la prevee indemnizasaun ba komunidade okupa fasilidade eskola
Eskola ne’ebé abitante sira okupa mak hanesan Eskola Ensinu Sekundáriu Jerál (ESJ) 12 novembru iha família rua, ESJ 04 setembru Balide iha família neen, Eskola 10 dezembru iha família 14, Eskola EBC Sérgio Vieira de Melo iha família neen, EBC Fatumeta iha família neen, Eskola Edukasaun Pre-Eskolár Esperansa iha família neen, Eskola Ensinu Sekundáriu Tékniku Vokasionál (ESTV) GTI Becora 01, Eskola ESTV HT Becora 01, Eskola ESTV Becora 4 no EBC Akadiru-hun iha família hitu.
Nune’e, Diretór ezije ba profesór sira atu tau nafatin kompromisu hodi kumpre obrigasaun atu kontribui ba desizaun ne’ebé Governu deside ona, ho nune’e labele trava fali dezenvolvimentu ne’ebé la’o daudaun.
“Profesór no família sira ne’ebé okupa hela área eskola nian labele harii tan uma iha eskola sira atu labele difikulta fali prosesu, bainhira Governu hasai komunidade hosi eskola ne’e,” nia tenik.
Nia fó hanoin, eskola nu’udar Estadu nia propriedade ne’ebé harii atu apoiu prosesu ensinu aprendizajen ba estudante sira, la’ós fatin atu harii fali uma privadu hodi hela.
“Tanba ne’e, eskola sira iha Dili tenke entrega ona ba Governu atu dezenvolve hodi harii fatin ida dignu ba estudante sira buka matenek,” Diretór ne’e dehan.
Ba kestaun ne’e, Agência Tatoli seidauk hetan konfirmasaun hosi parte okupante resintu eskola sira.
Jornalista : Tomé Amado
Editora : Julia Chatarina

