Top

Igreja sente lakon bibi atan di’ak no padre foun ida

Matebian Padre Abito José Brites Casimiro.Imajen/espesiál

DILI, 24 agostu 2022 (TATOLI)—Vigáriu Judisiáriu Arkidioseze Dili no Pároku Imaculada Conceição Balide, Padre, Graciano Santos Barros, hateten misa requiem ba Pe. Abito José Brites hanesan misa enseramentu ba moris iha mundu no misa abertura ba moris lalehan nian, maibé igreja Timor-Leste sente lakon bibi atan di’ak ida no padre foun ida.

Notísia Relevante: Forensik finaliza ona autopsia ba mate-isin Padre Abito Brites

“Ami sente lakon derrepente, ita rona katak Nai Lulik foinsa’e ida mate ho dezastre hanesan ne’e no ami duvida iha buat balun. Ne’ebé, ida-ne’e buat ida prejunsaun de inosénsia, ita ladún ba ema ida maibé ita entrega ba polísia envestigadór sira atu bele tau matan ba ida-ne’. Ne’ebé, antes ne’e halo autopsia hodi haree buat hotu, seraké iha posibilidade iha ne’ebá krime ka puru dezastre,” Padre selebrante Vigáriu Judisiáriu Arkidioseze Dili ne’e hateten ba jornalista sira iha Katedrál, Dili, kuarta ne’e.

Entretantu, hafoin misa requiem ramata, reprezentante familia, Pe. Juvito do Rego, agradese ba Maromak ne’ebé haraik moris ba Pe. Abito José iha familia nia leet, ida-ne’e hanesan rahun di’ak no hein katak grasa ne’ebé familia simu no maluk sira hotu ne’ebé koko Padre Abito nia moris hanesan ema no hanesan estudante iha eskola primáriu to’o sekundáriu, no mai semináriu Maiór Fatumeta no mós iha formasaun tomak, hanesan seminárista to’o sai amu lulik durante tinan haat (4) nia laran, hanesan tinan tolu no fulan hitu (7) nia laran.

Agradese ba formador sira hotu ne’ebé eduka Amu Abito José hosi eskola primáriu, sekundáriu mai to’o semináriu menór no maiór no mós amo, madre no hotu-hotu ne’ebé koolabora partisipa iha Maromak nia planu hodi lori Amo Abito José to’o iha altar lulik.

Iha fatin ne’e, maske rezultadu autopsia padre Abito nia mate sei segredu hela maibé rezultadu ida-ne’e fó investigasaun siéntifiika nian, ne’eduni ba sarani sira no familia hotu keta halo espekulasaun ba ida-ne’e.

“Ami triste tebes, katak média hasai notisia ne’ebé laloos, la hatene buat ne’ebé klaru no evidensia ne’ebé iha, rona anin de’it, tanba kari ona notisia iha públiku hodi dezakredita amu lulik nia dignidade, ami husu deskulpa ne’e laloos. Ba Polísia sira ne’ebé fó sai (informasaun) iha ne’ebá no rona informasaun mós la klaru, ami arrepende tebes,” nia apela.

Nia dehan, kazu ne’e saran ona ba PSIK no halo ona investigasaun no nia rezultadu ida-ne’e seidauk fó sai, ne’ebé di’akliu hot-hotu hein rezultadu ne’ebé PSIK fó sai atu nune’e bele hela ho kláreza, siéntifika ida-ne’ebé ema profisionál sira halo no keta kari anin.

Hafoin misa requem, reprezentante Arsebispu Arkidioseze Metropolitana Dili, Vigáriu Judisiariu Arkidioseze Dili, Pe. Graciano Santos Barros, hodi matébian nia fatin hakarak husu perdaun ba sala sira-ne’ebé Amu Abito José halo no liafuan ne’ebé la monu ba laran no mós hahalok sira ne’ebé hakanek ema balun nia fuan, hanesan ema sala nain, nia halo sala karik fó perdaun ba atu nia la’o ho kmaan ba Aman Lalehan nia uma.

Amo Graciano espresa sentimentu no agradesimentu ba família, liu-liu inan-aman hosi Amu Abito José Britis Casemiro ne’ebé oferese ona matébian ba kreda liu-liu ba Arkidioseze Dili to’o nia hakotu iis.

“Agradese ba família boot Hatulia ne’ebé tulun nia durante formasaun moris nu’udar Nai Lulik to’o lakon nia vida. Agradese ba semináriu, Amo Reitór ho nia formadór sira-ne’ebé fó apoiu ba nia durante hala’o kna’ar hanesan formadór di’ak iha semináriu,” bibi atan ne’e dehan.

Agradese mós ba doutor no pesoál saúde sira-ne’ebé ho sira-nia matenek tomak halo esforsu salva amo Abito nia vida, maibé Maromak nia planu oin seluk. Agradese ba Polísia Investigadór no Polísia Tranzitu sira ne’ebé fó apoiu iha investigasaun no movimentu sira hosi Hospitál mai semináriu, Katedrál no lori ba iha rate Maloa.

Agradese ba Amu Pároku, relijiosu no relijioza, Instituisaun Akademika sira hotu ba apoiu morál no materiál desde segunda to’o ohin.

Agradese ba Unio no Semináriu Propedeutico ba Preparação fatin atu halo’ot Amo nia isin. Agradese mós ba seminárista, aspirante, postulante no novisiadu sira-ne’ebé ida-ida ho nia apoiu no orasaun iha situasaun defisil ne’e.

Agradese ba grupu kategoriál sira iha parókia sira iha Dili ne’ebé ami la temi ida-ida ne’ebé hatudu ona sentidu lakon Nai Lulik di’ak ida hamutuk ho Arkidioseze Dili.

Misa requiem ne’e partisipa hosi sarani, família, padre-madre, frater, seminárista, no hafoin misa ramata, mate-isin amu Abito José Britis Casemiro lori ba haloot iha semitériu Maloa no hetan akopañamentu hosi Polisia Nasionál Timor-Leste to’o semitériu Maloa.

Entretantu reprezentante família. Pe. Juvito do rego, husu atu ema hotu-hotu labele halo espikulasaun ba Pe. Abito José Brites Casemiro nia mate ne’e, tanba rezultadu autopsia seidauk sai.

“Rezultadu ida-ne’e mai sei sai hanesan pontu partida ida atu ita oinsá mak haree prosesu mate ida-ne’e ba oin. Ida-ne’e ita lalika halo espekula, tanba rezultadu seidauk mai. Se mai ona mak ita ko’lia karik di’ak, agora seidauk mai ita labele ko’alia,” nia dehan.

Jornalista : Nelia Fernandes

Editór       : Cancio Ximenes

Publisidade

Leave a Reply

Latest Post

error: Content is protected !!