SEJD apoia $7.453,50 realiza programa tolu iha Bobonaro
BOBONARO, 24 Agostu 2022 (TATOLI) – Sekretaria Estadu Juventude no Desportu (SEJD) liuhosi Diresaun Asosiavizmu Juveníl, apoia orsamentu hamutuk $7.453,50 ba sentru juventude munisípiu Bobonaro hodi realiza programa tolu iha munisípiu Bobonaro tinan 2022.
Diretór Sentru Juventude Munisípiu Bobonaro, Alcino Barreto, informa programa tolu ne’e mak hanesan edukasaun sívika ho montante orsamentu $2.566.50, formasaun abilidade moris $2.566.50 no formasaun relasaun saudável ho montante $2.321.00.
Nia esklarese, programa kona-bá edukasaun sívika hahú implementa ona ba joven alvu sira iha suku Opa, postu administrativu Lolotoe durante semana ida.
Iha semana kotuk realiza formasaun abilidade moris iha suku Manapa, postu administrativu Cailaco, no fó formasaun relasaun saudável realiza iha edifísiu sentru juventude Maliana.
Notísia relevante: 2021, SEJD sei maximiza sentru juventude
“Hosi formasaun sira-ne’e ita atu muda joven sira-nia pensamentu, liuliu iha sosiedade no komunidade nia leet,” nia ko’alia iha suku Odomau, Maliana, kuarta ne’e.
Sentru juventude Maliana prioritiza implementa programa edukasaun sívika oinsá atu bolu partisipasaun komunidade nia atu hatene saida mak eleitorál, sidadaun no demokrasia, nune’e sira bele ezerse sira-nia direitu votu iha loron eleisaun, tanba dalabarak sidadaun balun lakohi partisipa iha festa demokrasia ne’ebe realiza tinan lima dala-ida.
Enkuantu formasaun kona-bá abilidade moris oinsá atu muda joven sira-nia mentalidade atu moris hanesan sidadaun ne’ebé di’ak iha sosiedade nia leet.
“Liuliu liga ba família dalabarak oan la respeita inan halo problema fali ho inan-aman, entaun liuhosi programa ne’e atu fanun fali sira-nia hanoin, nune’e ba futuru bele transforma sira-nia hanoin ba di’ak,” nia esplika.
Diretór ne’e subliña, dezde implementa programa hosi tinan 2021 to’o agora partisipasaun komunidade másimu tebes, liuliu joven sira-ne’ebé hela iha área rurál.
Atividade formasaun ne’e hala’o ona iha postu administrativu Balibo, Atabae, maibe ba oin sei kontinua implementa iha postu Administrativu Bobonaro.
Notísia relevante: SJMB identifika grupu haat seidauk ezekuta orsamentu ba atividade
Jornalista : Sérgio da Cruz
Editór : Evaristo Soares Martins
