Boxista na’in-rua hosi klube El-Matador sei bá kompete iha Austrália
DILI, 25 agostu 2022 (TATOLI)- Prezidente klube Boxe El-Matador no Treinadór Boxe, Abilio Orlando dos Santos, informa semana-oin, atleta na’in-rua hosi clube boxista ne’e bá tuir kompetisaun iha Australian Capital Territory Boxe iha Canberra-Austrália iha tinan ne’e.
Eventu ne’e, Klube El-Matadór partisipa tanba hetan konvite direta hosi Austrália no eventu ne’e rasik inklui de’it boxista sira iha sidade Austrália laran hanesan, Darwin, Canberra, Sidney, Malborne no seluk tan.
Notísia relevante: Delio okupa segundu lugar boxe SEA Games
Tanba ne’e, delegasaun ne’e arranka bá Austrália iha loron 29 agostu to’o 14 setembru. Delegasaun ne’e kompostu hosi atleta ka Boxista Delio Mouzinho, Elídio da Conceição no Treinadór Abilio Orlando dos Santos.
Atleta rua ne’e hanesan Delio sei joga iha kilograma 67 to’o 71 no Elidio sei joga iha kilograma 51 to’o 54.
“Ha’u nia Boxista na’in-rua sei bá Austrália, tanba durante ne’e sira preparadu ona atu ba kompete, maske ba hanesan klube, maibé sei reprezenta Timor-Leste ba rai li’ur liuhosi modalidade desportu boxe,” dehan Prezidente ne’e ba Agência TATOLI iha kampu Benfika Colmera- Dili, kinta ne’e.
Viajen ne’e hetan rekoñesimentu hosi Federasaun Boxe Amadora Timor – Leste (FBATL) no hetan mós apoia orsamentu $1,500 hosi Sekretáriu Estadu Juventude no Desportu (SEJD).
Enkuantu, billete aviaun no akomodasaun seluk hanesan hahán no toba fatin durante hela iha Austrália ne’e komisaun iha ne’ebá mak prepara to’o atleta sira ne’e fila hikas mai Timor-Leste.
“Nune’e, ha’u fiar katak alin sira ba hatudu jogu ne’ebé di’ak iha ne’ebá, sira ba ne’e la’ós ba joga de’it, maibé aproveita ba halo mós treinamentu iha ne’ebá fasilidade ema mak prepara hotu,” nia dehan.
Iha fatin hanesan, Boxista Delio Mouzinho, sente kontente no orgullu bele ba partisipa iha eventu internasionál ne’e no promote sei hatudu prestasaun ne’ebé di’ak.
“Ami nia treinadór Abilio Orlando, bolu fali ha’u ho kolega atu ba joga iha Austrália ne’e oportunidade di’ak tebes, mai ha’u no kolega atu hatudu nafatin ami nia prestasaun ho di’ak,” nia kompromete.
Nune’e mós, Boxista Elídio da Conceição, sente kontente hanesan atleta ho idade ne’ebé nurak bele ba kompete ona iha eventu internasionál sira, nune’e kompromete sei hatudu prestasaun di’ak iha jogu ne’e.
“Durante fulan ida resin ha’u ba halo treinamentu iha Bali Indonézia, hetan esperiénsia ne’ebé di’ak tanba suporta hosi klube El-matadór, iha Bali ami treinu kona-ba fiziku no tékniku sira, ha’u fiar iha jogu ne’ebé hala’o iha Austrália, Ha’u sei joga ho di’ak,” nia informa.
Notísia relevante: Delio Anzaqeci “tuku monu” Boxista Kamboja iha ronde daruak
Jornalista: Hortencio Sanchez
Editór : Florencio Miranda Ximenes
