EUA kapasita ekipa téknika na’in-56 hodi utiliza fasilidade ICU movel

DILI, 25 agostu 2022 (TATOLI)— Estadu Unidu Amérika (EUA), fó kapasitasaun ba ekipa téknika hosi Hospitál Nasionál Guidu Valadares (HNGV) no Ministériu Saúde na’in-56, atu utiliza fasilidade Kuidadu Intensivu (ICU,sigla Portugés) movel.

“Ekipa téknika na’in-56 termina ona formasaun téknika ba operasaun fasilidade ICU movel ne’e, bainhira instala ba utilizasaun oksijéiu, bee no eletrisidade hodi fó tratamentu saúde ba pasiente grave uza ICU movel ne’e. Tuir planu sei utiliza iha fulan setembru ka outubru nia laran,” Diretór Klíniku Hospitál Nasionál Guido Valadares, Marcelino Correia ba Agência TATOLI via telefónika, kinta ne’e.

Iha formasaun ne’e, ekipa tékniku sira aprende atu halo tratamentu ba pasiente sira iha ICU movel no oinsá atu utiliza ekipamentu sira iha ICU movel ne’e.

“Sira nia treinamentu ne’e hanesan oinsá atu loke ahi, oinsá atu loke tombol bee sai, no oinsá atu utiliza eletrisidade iha laran no oinsá atu halo manutensaun ba ekipamentu sira ne’e,” nia afirma.

Entretantu, Governu no povu Estadu Unidu Amérika (EUA), sesta ne’e, oferese Unidade Kuidadu Intensivu (ICU, sigla inglés) movel ba Timor-Leste hodi entrega ba Hospital Nacional Guido Valadares (HNGV) hodi alarga kapasidade servisu saúde no sei fó kuidadu intensivu ba pasiente COVID-19 no populasaun vulnerável sira.

Fasilidade ho padraun internasionál ne’e entrega hosi Enkaregadu Negósiu Embaixada EUA, Zema Semunegus, ne’ebé simu hosi Prezidente Repúblika (PR), José Ramos Horta no Ministra Saúde (MS), Odete Maria Freitas Belo, iha Portu Dili.

Prezente ne’e mai hosi povu amerikanu ne’ebé hakarak ajuda Governu hodi responde ba nesesidade servisu saúde, iha fatin hotu iha nasaun ne’e. Bainhira funsiona ICU nia kapasidade sei aumenta 150%.

Ekipamentu ne’ebé hetan maka kama ICU movel sia ho dezeña inkluzivu atu fornese asesu fasil ba ema ho defisiénsia sira.

Fasilidade ne’e nu’udar parte ida hosi orsamentu millaun $20 ne’ebé EUA oferese hodi apoia Timor-Leste ninia seguransa saúde inklui doasaun vasina Pfizer doze 200.000 resin.

Fasilidade ICU movel ne’e reflete kompromisu atuál EUA hodi luta hasoru COVID-19 no moras sira seluk hodi salva vida timor-oan sira.

Enkuantu, Komandu Indo-Pasífiku no Ajénsia Estadu Unidu ba Dezenvolvimentu Internasionál serbisu hamutuk ho ajénsia EUA no Governu Timor-Leste hodi harii no fornese ICU movel.

Notísia relevante: EUA apoia fasilidade ICU movel ba Timor-Leste

Jornalista : Felicidade Ximenes

Editór        : Florencio Miranda Ximenes