DILI, 26 agostu 2022 (TATOL I)— Governu liuhosi Ministériu Saúde, durante ne’e konsege konstrui ona postu saúde hamutuk 271, iha suku 271, iha territóriu nasionál.
Tuir politika Governu kada suku iha territóriu nasionál tenke kontrui postu saúde ida, maibé oras ne’e daudaun Ministériu Saúde konstrui postu saúde hamutuk 271 signifika konstrui metade ona iha territóriu nasionál.
Konstrui postu saúde sira ho objetivu atu lori besik saúde ba komunidade sira no hafasil asesu ba saúde, ho meta atu sidadaun hotu moris ho saudavél.
“Tuir loloos postu saúde ne’e, ita tenke konstrui nivél suku tanba ita iha suku 452, entaun Ministériu Saúde konstrui ona postu saúde metade ona hosi totál suku iha territóriu nasionál,” Diretora Nasionál Administrasaun Lojístika no Patrimóniu Ministériu Saúde, Emilia Mendonça ba Agência TATOLI nia kna’ar fatin MS Caicoli, sesta ne’e.
Tuir planu estratéjia setór saúde 2011 to’o 2030, katak kada tinan Ministériu Saúde tenke konstrui postu saúde 25, maibé tenke halo ajustamentu ho alokasaun disponibilidade orsamentu Governu nian ne’ebé aloka mai iha Ministériu saúde ba asuntu infraestrutura nian.
“Postu saúde ne’ebé mak ita iha ne’e la’ós mai hosi Ministériu Saúde nia fundu mesak, maibé mai mós ho Ministériu Administrasaun Estatál kabe ba polítika desentralizasaun inklui parseiru KOICA,” nia akresenta.
Iha baze dadus ne’ebé mak Ministériu Saúde iha hahú husi ukun-an mai to’o tinan ida ne’e konstrui ona servisu saúde munisípiu ka edifísiu 12 la konta ho REAOA no Ataúro.
Governu konsege konstrui Sentru Saúde 68, Laboratóriu 24, Sentru internamentu 12, rezidénsia médiku 126 no iha períodu COVID-19 konstrui tan izolamentu 12, kuarentena haat. Nune’e mós konstrui uma mahon ba sobrevivente sira hamutuk tolu, inklui ospitál rejionál haat.
Jornalista : Felicidade Ximenes
Editór : Florencio Miranda Ximenes
