PR Horta despede boxista na’in-rua hosi El-Matador bá kompete iha Austrália

DILI, 26 agostu 2022 (TATOLI)– Prezidente Repúblika, José Ramos Horta, sesta ne’e, hala’o despedida ho atleta ka boxista na’in-rua hosi El-Matador Boxing Club, ne’ebé sei reprezenta Timor-Leste bá partisipa no kompete eventu boxe iha Austrália.
Lideransa El-Matador Boxing Club hasoru malu ho Prezidente-Repúblika ho objetivu atu informa no despede kona-bá atleta nain-rua ne’ebé mak arranka bá Austrália iha segunda (29/08), atu tuir kompetisaun no formasaun iha Austrália.
Notísia relevante: Boxista na’in-rua hosi klube El-Matador sei bá kompete iha Austrália

“Ohin, ekipa ne’ebé atu arranka bá Austrália, iha semana oin, mai despede ho Prezidente Repúblika no fó lia-menon. Ita nia Prezidente Repúblika husu ami atu bá ho responsabilidade no sai hanesan Embaixadór durante tuir atividade iha Austrália,” Prezidente El-Matador Boxing Clube, Abilio Orlando dos Santos, hateten hafoin enkontru ho Xefe Estadu, iha Palasiu Prezidensiál, Bairru-Pité-Dili.
Ekipa Timor-Leste sei partisipa hosi ema na’in-tolu hanesan atleta ka boxista na’in-rua hanesan Delio Mouzinho, Elidio da Conceição no treinadór hanesan mós Prezidente, Abilio Orlando dos Santos.
Delegasaun ne’e, arranka bá Austrália iha loron 29 agostu to’o 14 setembru tinan ne’e.
Atleta rua ne’e hanesan Delio sei joga iha kilograma 67 to’o 71 no Elidio sei joga iha kilograma 51 to’o 54.
Sekretáriu Estadu Juventude no Desportu (SEJD) apoia fundu $1,500 hanesan osan bolsu ba ekipa no ba akomodasaun no billete apoia hotu hosi komisaun ba eventu boxe iha Austrália.
Notísia relevante: Governu entrega ona subsídiu ba Boxista Delio Mouzinho
Jornalista: Hortencio Sanchez
Editór : Florencio Miranda Ximenes

