iklan

HEADLINE, SAÚDE

Mákina avaria, HNGV esforsu transfere pasiente fase-raan grave bá ospitál Kupang

Mákina avaria, HNGV esforsu transfere pasiente fase-raan grave bá ospitál Kupang

Pasiente na'in-96 preokupa tebes ba mákina fase-raan ne’ebé avaria iha HNGV tan fó risku boot sira nia vida. Imajen/Felicidade Ximenes

DILI, 01 setembru 2022 (TATOLI)- Diretora Jerál Prestasun Saúde, iha Ministériu Saúde, Odete da Silva Viegas, hateten relasiona ho mákina fase raan ne’ebé avaria ne’e, daudaun Médiku sira iha Hospitál Nasionál Guido Valadarese (HNGV) hahú esforsu hela atu transfere pasiente ne’ebé mak grave ba iha Hospitál Siloam-Kupang.

“Ita nia médiku sira iha HNGV esforsu atu transfere sira ne’ebé grave, hanesan pasiente fase-raan semana ida dala-rua ka dala-tolu bá Ospital Siloam Kupang atu halo tratamentu,” Diretora ne’e hateten ba Agência TATOLI via telefónika, kinta ne’e.

Ba pasiente sira ne’ebé ladun grave ne’e, nia dehan presiza hein mákina RO filter bee ne’ebé mak kompaña Inti Sumber bá sosa ona iha Indonézia no aban, sesta (02/09) to’o Timór-Leste, atu halo kedan manutesaun mak fó tratamentu ba sira.

Mákina fornese bee ka planta de agua ba makina fase-raan mak avaria ka aat, ne’ebé halo mákina tomak fase raan nian labele funsiona hodi fó atendimentu ba pasiente sira.

Mákina ne’ebé mak fornese bee ba mákina fase-raan iha HNGV iha unidade ida de’it, nune’e la sufisiente ka laiha kapasidade atu atende mákina fase-raan ho unidade 12.

Pasiente na’in-96 preokupa

Entretantu, Reprezentante pasiente fase-raan, Fabiola Araújo, hateten pasiente na’in-96, preokupa tebes ba mákina fase-raan avaria iha HNGV tanba sai problema ka fó risku boot ba pasiente sira nia vida.

Pasiente fase-raan, Fabiola Araújo.Imajen/Felicidade Ximenes

“Mákina fase-raan avaria sai problema boot ba pasiente sira ne’ebé halo tratamentu iha ne’e. Nune’e ami husu ba na’in-ulun sira atu tau atensaun lalais ba mákina ne’e tanba ami nia moris daudaun ne’e depende ba mákina ne’e.  Se mákina avaria ami nia moris mós la naruk,”katak pasiente Fabiola Araújo iha edifisiu Departamentu hemodiálize HNGV, kinta ne’e.

Atu labele fó risku ba vida pasiente, nia husu ba Ministériu Saúde atu transfere urjente pasiente hirak ne’ebé mak nia vida depende ba makina fase-raan nian.

”Ami husu ba Ministéru Saúde no Hospitál Nasionál Guido Valadares liuliu juntamediku atu aseleira lalais problema ne’e tanba ami nia dokumentu kompletu atu transfere lalais ba rai li’ur,” nia sujere.

Tuir oráriu pasiente Fabiola Araújo rasik durante fase-raan iha Hospitál Nasionál Guido Valadares (HNGV) semana ida dala-rua.

Iha biban hanesan, Octavio do Santos, mós preokupa no husu ba Ministériu Saúde atu trata dokumentu pasiente sira nia hodi transfere urjente ba fase-raan iha rai li’ur.

“Ami husu ba Minsitériu saúde halo esforsu oinsá atu aban, ami tenke sai bá rai li’ur tanba ami nia moris ne’e depende ba mákina, liuliu loron ida fase dalarua ka dalatolu se ida ne’e mak la fase ami mate hotu,” katak nia ho triste.

Notísia relevante: Mákina avaria, HNGV la atende pasiente fase-raan

Jornalista : Felicidade Ximenes

Editór         : Florencio Miranda Ximenes

iklan
iklan

Leave a Reply

iklan
error: Content is protected !!