iklan

HEADLINE, SAÚDE

MS: ai-moruk herbal balun sirkula ilegál iha Timor-Leste

MS: ai-moruk herbal balun sirkula ilegál iha Timor-Leste

Xefe Departamentu Jestaun Autorizasaun no Introdusaun Merkaduria iha Ministériu Saúde, Teodoro Marçal de Jesus.Imajen/ Felicidade Ximenes

DILI, 01 setembru 2022 (TATOLI)— Xefe Departamentu Autorizasaun no Introdusaun Merkadu Produtu Farmásia no Medikamentu, Diresaun Nasionál Farmásia hosi Ministériu Saúde, Teodoro de Jesus, hateten importadór ai-moruk herbal ne’ebé la rejistu nia-produtu iha sistema dadus atu kontrola kualidade, konsidera fó risku ba saúde públika ne’e ilegál.

“Produtu ka ai-moruk herbal ne’ebé la rejistu iha Ministériu Saúde konsidera ilegál, liuliu produtu husi K-LINK ho HWI ne’ebé durante ne’e la rejistu”, hateten Xefe Departamentu ne’e ba Agência TATOLI iha nia kna’ar fatin, kinta ne’e.

Tuir dekretu lei númeru 12/2004, ne’ebé define loloos katak produtu herbal ne’ebé importa mai Timor-Leste ne’e tenke iha autorisazaun husi Ministériu Saúde liliu Diresaun Nasionál Farmásia.

Lejizlasaun ne’e katak importadór sira ne’ebé la tuir regra tenke selu multa ho valór minimu $1.500 no másimu $5.000 ba tipu ai-moruk nian.

Enkuantu, ai-moruk tama iha portu tenke selu tipu  ida $100 no prense kritériu, kuandu laiha sei hetan koima ka selu ho $50.000 to’o $100.000. Nune’e mós la prense kritéria bázika, ministériu fó xamada atensaun bele mós taka sira nia negósiu.

Nune’e, nia konsidera produtu ka ai-moruk ne’ebé importadór sira la rejistu iha sistema Departamentu Jestaun Autorizasaun no Introdusaun Merkadu nian tama lista ilegál no la garante nia-kualidade atu sidadaun konsumu.

“Ita husu ba empreza importadór sira atu rejistu produtu herbál sira iha ministériu saúde hodi garante direitu komsumidór sira nian,” nia sujere.

Daudaun MS rejista ai-moruk herbal ne’ebé rejista iha ministériu saúde hamutuk tipu lima hanesan tianshi jiang zhi tea, tianshi vitaline softgels, tianshi zinc, tianshi nutrition calcium, no tianshi chitin chitosan ne’ebé mai hosi nasaun Indonézia.

Tuir dadus ministériu saúde rejista kompañia ne’ebé hala’o atividade farmásia hamutuk 11, kompostu klínika privadu Foho Osan Mean, Istana Farmasia, Moris Foun, Bethesda Husada, Stamford Medical, importadór aimoruk Armagest, Melia Herbal, Noiboe, Proargy SW, Kura Hao no Acibee AIM.

Empreza ne’ebé hetan rejistu no hetan autorizasaun husi ministériu saúde liuliu Diresaun Nasionál Farmasia hodi faan sira-nia produtu herbal mak Kompañia B. A Gomi-2 Unipesoal Lda no Kompañia Jomardo Lda.

Empreza sira seluk ne’ebé seidauk hetan rejistu ne’e, tuir nia, signifika seidauk iha autorizasaun atu importa produtu herbal hodi distribui, sirkula no utiliza iha Timor-Leste. Empreze hirak ne’ebé seidauk rejistu iha Diresaun Nasionál Farmásia nian.

Jornalista   : Felicidade Ximenes

Editór           : Florencio Miranda Ximenes

iklan
iklan

Leave a Reply

iklan
error: Content is protected !!