Mákina fase-raan iha HNGV hahú funsiona hikas
DILI, 02 setembru 2022 (TATOLI)— Diretór Ezekutivu Hospitál Nasionál Guido Valadares (HNGV), Alito Soares, informa mákina fase-raan hahú funsiona hikas, hafoin halo manutensaun ba mákina filtru bee.
“Mákina RO filter, ohin to’o iha aeroportu, ami ba foti no mai halo manutesaun kedan ka monta ona, nune’e mákina funsiona ona hodi bele fó atendimentu ba pasiente fae-raan sira,” Diretór Ezekutivu ne’e hateten ba Jornalista sira iha HNGV, sesta ne’e.
Notísia relevante: Mákina avaria, HNGV la atende pasiente fase-raan
Mákina RO filter ne’e sosa hosi empreza Inti Sumber iha Indonézia iha loron, 31 agostu no ohin to’o hodi halo kedan manutesaun, nune’e funsiona hikas.
Hospitál Nasionál Guido Valadares (HNGV) liuhosi Departamentu Hemodiálize, sesta dadeer (02/09), hahú fó atendimentu ba pasiente ne’ebé ho moras rins tanba mákina RO (Filtru bee) ne’ebé utiliza hodi dulas raan di’ak ona.
Médiku iha Departamentu Hemodiálize hahú fó atendimentu ka prioritiza ba pasiente fase-raan grave sira no tuir fali mak pasiente kamaan. Tanba la konsege transfere fali ba hospital Kupang-Indonézia.
Entretantu, Pasiente fase-raan na’in-96, sente kontente no agradese tanba mákina fase-raan iha HNGV hahú funsiona hodi salva sira nia vida.
”Ami agradese ba Hospitál Nasionál Guido Valadares (HNGV) tanba ho esforsu tomak mákina ne’e monta no agora di’ak atu hahú atende ami pasiente fase-raan sira,” agradese Reprezentante pasiente fase-raan, Valentino Araújo
Tuir observassun hosi Jornalista Agência TATOLI iha tereñu nota katak mákina funsiona ona no dadaudaun pasiente grave sira hahú hetan atedimentu ona.
Instala tan mákina fase-raan 20
Entretantu, Diretór Alito Soares mós informa planu ba oin HNGV sei instala mákina fase-raan hamutuk 20 hodi hataan ba pasiente sira ne’ebé presiza fase-raan.
“Ita iha Orsamentu Jerál Estadu 2022 hodi instala mákina to’o 20 para labele hamosu problema ba pasiente sira fase raan,” nia afirma.
Maske, HNGV hasoru difikuldade barak, maibé iha kompromisu atu hadi’a di’ak liután ekipamentu no fasilidade hodi fó atendimentu ba pasiente sira ho di’ak.
“To’o agora mákina fase raan hamutuk unidade 12, maibé ita hakarak ba oin aumenta tan no buka solusaun mós ba RO filter bee atu labele iha risku ba pasiente sira,” katak nia.
Daudaun ne’e kompaña inti sumber sira halo reabilita ba fatin ka edifísiu hemodiálize atu bele instala hotu mákina to’o unidade 20 hodi bele responde nesesidade pasiente sira nia.
Notísia relevante: Mákina avaria, HNGV esforsu transfere pasiente fase-raan grave bá ospitál Kupang
Jornalista : Felicidade Ximenes
Editór : Florencio Miranda Ximenes
