iklan

DESPORTU, DILI, HEADLINE

LFTL hahú komunika klube futeból primeiru-segundu divizaun realiza liga Timorense

LFTL hahú komunika klube futeból primeiru-segundu divizaun realiza liga Timorense

SEJD Abrão Saldanha, Prezidente FFTL, Francisco Jerónimo ho Prezidente LFTL Nilton Telmo Gusmão. Imajen/LFTL

DILI, 05 setembru 2022 (TATOLI)— Liga Futeból Timor-Leste (LFTL), segunda ne’e, hahú komunika klube futeból primeiru no segundu divizaun hodi diskute realizasaun liga Timorense époka 2022 no 2023.

Prezidente Liga Futeból Timor – Leste (LFTL), Nilton Gusmão, hateten LFTL kontinua esforsu hodi buka osan uitoan atu aumenta ba orsamentu ne’ebé apoia hosi Federasaun Futeból Timor – Leste (FFTL) no Sekretáriu Estadu Juventude no Desportu (SEJD) ho montante $400.000 hodi bele realiza liga Timorense.

Notísia relevante: Semana oin, LFTL komunika klube futeból realiza liga époka 2022-2023

“Ohi, ami ko’alia hamutuk ho klube futeból-sira oinsá atu haree ba realizasaun jogu, ami sei buka atu kompleta osan ne’ebé iha ona ho montante $400.000 hosi FFTL no SEJD ne’e, maibé ami depende ba empreza provadu sira atu sai patrosinadór mai ami,” dehan Nilton ba Jornalista-sira iha Ótel JLVila Aimutin Dili, segunda ne’e.

Maski, Ho tempu ne’ebé besik  ona sente imposivel atu patrosinadór sira atu apoia osan ba LFTL hodi kompleta orsamentu ne’ebé iha ona, mabé esforsu hodi garante hetan osan uitoan hodi sustenta atividade liga époka ne’e.

“Ami tenta masimu tebes atu hetan osan atu kompleta de’it osan ne’e, ami labele buka osan hodi organiza, maibé buka atu kompleta. Hosi osan ne’ebé mak parte rua fó ona osan ami, maibé presiza tan $195.000 ba kompetisaun metade, se kompetisaun nakonu ita presiza tan $295.000, ida ne’e todan uitoan mai ami, maibé ami sei esforsu,” nia dehan

Tanba LFTL hakarak liga tenke la’o iha tempu besik, maibé liga atu la’o tenke iha klube-sira no daudaun ne’e klube sira mós prontu koopera atu liga la’o di’ak.

Iha fatin hanesan, Fundadór Klube segunda divizaun Zebra FC, Rogério Moc husu ba parte rua liuliu LFTL no FFTL atu ko’alia ho ulun malirin atu rezolve kestaun ka problema sira, nune’e liga bele la’o lalais.

“Ami ko’alia hotu ona, maibé depende ba LFTL sei ba hasoru FFTL, iha 12 setembru  ne’e, atu sira konkorda malu hodi liga bele la’o ona. Maibé ami nia ezijénsia ba sira mak ne’e, tenke koalia ho ulun malirin ba malu labele vinga malu atu liga ne’e bele la’o lais tanba la’e ami klube no jogadór sira mak sai vitima tanba tinan tomak jogu la la’o,” nia sujere.

Notísia relevante:  FFTL husu LFTL koopera realiza liga futeból époka 2022 

Total klube primeira divizaun no segunda divizaun ne’ebé hamahan aan iha LFTL hamutuk 18 ne’e mak hanesan primeira divizaun AD SLB Laulara, AS Ponta Leste, Karketu Dili FC, Assalam FC, Emanuel FC, Aitana FC, Atletico Ultramar, Academica FC no Porto Taibessi FC.

Enkuantu, Segunda Divizaun mak hanesan, Kablaki FC, Nagardjo FC, DIT FC, Lica-Lica FC, Lemorai FC, AS Marca, FIEL FC, Zebra FC no Boavista FC Timor.

SEJD-FFTL aloka $400.000

Antes ne’e, Prezidente Federasaun Futeból Timor-Leste (FFTL), Francisco Martins da Costa Pereira Jerónimo, hateten hahú ko’alia ona ho Sekretáriu Estadu Juventude no Desportu (SEJD) kona-ba finansiament , nune’e  garante sei realiza liga futeból époka 2022-2023.

“Ha’u hasoru malu ona ho Sekretáriu Estadu Juventude no Desportu (SEJD) hodi ko’alia kona-ba orsamentu atu realiza liga ne’e. Ami (FFTL) sei tau $200.000 no Sekretáriu Estadu Juventude no Desportu (SEJD) tau $200.000,” Prezidente FFTL ne’e hateten ba Agência TATOLI iha Muséu Rezisténsia-Caicoli.

Nune’e, Prezidente FFTL ne’e dehan orienta ona tékniku sira atu hahú kontaktu ho Liga Futeból Timor-Leste (LFTL) atubele haree hamutuk data fiksu ba realizasaun liga futeból époka 2022.

“Tanba ita hakarak liga ne’e tenke la’o iha fulan agostu ne’e, maibé depende ba servisu tékniku sira ninian,Tanba ne’e husu ba parte LFTL tenke pronunsia buat ruma oinsá atu realiza liga iha tempu besik,” nia afirma.

Notísia relevante:  18 agostu, LFTL abertura jogu primeiru no segundu divizaun époka 2022

Jornalista: Hortencio Sanchez

Editór     : Florencio Miranda Ximenes

iklan
iklan

Leave a Reply

iklan
error: Content is protected !!