iklan

DESPORTU, DILI, HEADLINE

Pedro Aparício husu membru PSHT hakmatek hodi kontribui pás no estabilidade

Pedro Aparício husu membru PSHT hakmatek hodi kontribui pás no estabilidade

Sekretariu Jeral PSHT no Advogadu, Pedro Aparicio.Imajen Tatoli/Antonio Goncalves

DILI, 07 setembru 2022 (TATOLI)—Sekretáriu Jerál PSHT, Pedro Aparício Guterres, husu ba estrutura organizasaun arte-marsiál Persaudaraan Setia Hati Terate (PSHT) no membru tomak atu hakmatek hodi kontribui nafatin ba pás no estabilidade.

“Ha’u husu ba membru PSHT iha territóriu nasionál hotu atu hakmatek ho kalma, labele utiliza atributu tún sa’e iha dalan ninin, hodi fó podér tomak ba F-FDTL no PNTL atu hakalma situasaun no buka tuir ema sira provokatór hodi garante pás no estabilidade iha Timor-Leste,” Sekretáriu Jerál PSHT ne’e dehan liuhosi konferénsia imprensa ne’ebé hala’o iha Sekretariadu PSHT iha Timor Lodge, kuarta ne’e.

Estrutura PSHT fó-sai apelu ne’e relasiona ho kazu joven ida nu’udar membru PSHT ne’ebé mate ho kondisaun tali iha kakorok iha sela detensaun Komandu Munisípiu Dili, kinta (01/09) no mós iha konfrontu ne’ebé akontese iha área Akadiruhun ne’ebé konsege hakanek membru F-FDTL ida.

Nune’e, PSHT mós prontu atu fó kompensasaun ba komunidade nia sasán hanesan uma ne’ebé  hetan estraga durante konfrontu iha Akadiruhun nian, segunda (05/09).

“Ba komunidade ne’ebé nia sasán hetan estraga, ami PSHT husu deskulpa no ami sei selu fali imi nia sasán, imi bele mai iha fatin Timor Logde hodi halo reklamasaun atu ami nia ekipa ba verifika loloos mak ami selu fali,” nia kompromete.

Nune’e mós husu ba família no kolega matebian ho naran kompletu José Bernardo nu’udár membru PSHT ne’ebé hetan graduasaun iha tinan 2019 atu entrega prosesu investigasaun hotu ba PNTL.

Pedro Aparício mós husu ba membru PSHT tomak atu fó sentidu luta ba membru Arte-Rituál 77 ne’ebé hakotu ona iis iha Oospitál Nasionál Guido Valadares (HNGV, sigla portugés) no husu nafatin atu membru hakmatek, maski iha provokasaun.

“Alin ida mate ne’e dehan alin ida natoon mate iha sela mak tuku, nia monu baixa iha ospitál to’o mate. Agora sira na’in-rua ne’ebé halo problema mate hotu ona. Nune’e, ita moris ne’e labele ba kria tan problema, maibé tuur hakmatek, maski sira provoka ita,” nia sujere.

Sekretáriu Jerál PSHT ne’e konsidera problema sai boot to’o ohin loron tanba nia-hun mai hosi membru arte rituál balun, iha loron 18 agostu liubá, asalta no baku kanek membru PSHT nian iha Vila-Verde, hafoin ramata graduasaun no atu fila ba uma.

“Problema akontese to’o ohin loron ne’e hahú kedas iha 18 agostu liubá, bainhira ha’u nia membru sira ramata graduasaun fila iha dalan hetan ataka iha dalan Vila-Verde nian bainhira atu fila bá uma, feto na’in rua hetan ataka husi grupu arte rituál 77 nian balun, baku alin feto na’in rua ne’e to’o ulun nakfere tama baixa iha ospitál ne’e mak kait to’o agora,” Pedro esklarese liuhusli konferénsia imprensa ne’ebé halao iha sekretariadu PSHT iha Timor Lodge.

Hosi akontesimentu hirak-ne’e, estrutura PSHT deskonfia membru balun husi arte rituál 77 komesa hatais farda PSHT no Kera Sakti nian iha fatin públiku hodi halo provokasaun hodi fó sai iha média sosiál kaer rama-ambon.

Nia dehan PSHT agradese tebes ba Governu tanba bainhira re-ativa arte marsiál tolu hanesan IKS, PSHT no KORK, laiha problema ida hanesan uluk akontese.

“Ami la halo problema ona tanba ami halo graduasaun IKS no KORK kolabora ho ami hodi fó kontribuisaun ne’ebé másima. Iha fatin sira halo graduasaun ne’e só Dili de’it mak mosu problema, seluk ne’e laiha,” nia apresia.

Maibé, nia dehan konfrontu ne’ebé akontese iha área Akadiruhun ne’e tanba iha membru balun hosi arte rituál nian mak halo provokasaun uluk ka tuda membru PSHT sira.

“Provokasaun hodi perturba órden públiku ne’e sé mak halo. Sira (membru arte rituál 77) mak halo no hein ha’u nia membru sira iha dalan ho fatuk sa’e ba iha uma leten mak tuda tun mai kona kanek membru sira ne’e mak halo problema boot mosu iha ne’ebá ne’e,” nia akresenta.

“Ida ne’e mak kolega FALINTIL-Forsa Dfeza Timor-Leste (F-FDTL) ne’e antes ne’e la hatais faru no tabik ho joven sira halo problema bainhira labele ona nia ba hatais fali farda mai dehan halo atuasaun, maibé nia baku fali ha’u nia membru sira, nusa nia la hakalma joven barak iha nia bairru ne’e,” nia katak.

Tanba ne’e, nia husu ba Komandu F-FDTL atu investiga didi’ak membru ne’e hodi hatuur lia-loos tuir nia dalan, tanba membru PSHT sira kolabora no submete ona ba prosesu detensaun hodi hein faze investigasaun nian.

Nia hatutan, PSHT kumpri nafatin lei ne’ebé iha tuir rezolusaun ne’ebé iha fó legalizasaun ba organizasaun ne’e bainhira ba rejistu iha Ministériu Justisa (MJ).

Daudaun ne’e, Governu seidauk iha lei ida hodi regula grupu arte rituál, nune’e mak susar atu identifika sira halo problema tanba konsidera sira ne’e hanesan hela grupu ilegál.

“Sira ne’e grupu ilegál tanba laiha estrutura no lei ruma regula sira, rejistu ne’e só ami PSHT IKS no KORK, sira ne’e illegal, nune’e mosu problema hanesan ne’e atu buka sira-nia boot ida hodi rezolve, to’o agora laiha ne’ebé Governu tenke haree sira kria lei ruma hodi regula sira,” nia sujere.

Kona-ba kestaun ne’e, jornalista TATOLI tenta atu konfirma lideransa Arte Rituál 77 nian, maibé seidauk bele fó komentáriu no sei fó komentáriu iha tempu besik.

Notísia relevante:  Komandu F-FDTL hahú investiga kazu sivíl tuda kanek Sarjentu Joanico Baptista

Jornalista      : Hortencio Sanchez

Editór              : Florencio Miranda Ximenes

iklan
iklan

Leave a Reply

iklan
error: Content is protected !!