iklan

EKONOMIA, BOBONARO, HEADLINE, MUNISÍPIU

BNCTL sei instala mákina ATM iha Bobonaro

BNCTL sei instala mákina ATM iha Bobonaro

Asistente divizaun Operasionál BNCTL, Alípio Ximenes, halo hela aprezentasaun iha semináriu nasionál ho tema “Papél setór bankária no privadu hodi promove dezenvolvimentu ekonomia nasionál” ne'ebé hala’o iha munisípiu Bobonaro. Imajen Tatoli/Sérgio da Cruz.

BOBONARO, 09 setembru 2022 (TATOLI)—Banku Nasionál Komérsiu Timor-Leste (BNCTL, sigla portugés), sei instala mákina Automatic Teller Machine (ATM) iha postu administrativu Bobonaro, munisípiu hodi fasilita kliente sira foti osan.

Asistente divizaun operasionál BNCTL, Alípio Ximenes, informa asuntu ne’e hodi responde ba preokupasaun emprezáriu sira iha ámbitu sai oradór ba semináriu “Papél setór bankária no setór privadu atu promove dezenvolvimentu ekonomia nasionál” ne’ebé iha salaun Kámara Eklidistika Diosoze Maliana tuan, suku Lahomea, sesta ne’e.

Notísia relevante: Kliente BNCTL 100.000 resin utiliza ona ATM P24

“Ami planeia instala ATM iha postu administrativu Bobonaro, ami haree ona rai, depois sei loke mós ajénsia ida iha Batugade no Bobonaro. Karik tinan ida-ne’e la posível entaun tinan oin, maibe ida-ne’e hanesan mehi BNCTL nian ne’ebé mak sei realiza ho fazeadamente,” nia hateten iha intervensaun.

Kona-bá instala iha postu administrativu Lolotoe, Diretór ezekútivu BNCTL,Brigidio de Sousa, reforsa, banku nia polítika atu instala mákina ATM iha postu administrativu sira, maibé tanba kestaun kustu ba sosa mákina ne’e ida rihun $28 kedas, inklui kria kondisaun hodi garante ninia funsionamentu, tan ne’e mak to’o agora seidauk tau iha prioridade.

“Ita tenke halo nia uma, tenke tau AC 24 oras, liña tenke estavel, tenke monta seguransa atu asegura buat sira-ne’e, depois nia kustu manutensaun karun loos. Razaun hirak-ne’e mak ita la favorese,” nia hateten.

Nia dehan, meiu seluk ne’ebé kliente sira bele uza foti osan mak daudaun ne’e BNCTL instala ona sistema Banku venda ka Point Off Sales (POS) iha loja postu administrativu sira , nune’e bainhira presiza osan $20 ba leten bele koir de’it iha mákina ne’e osan sei sai tuir nesesidade.

“Ita monta mákina POS ne’e tanba fasil liu atu halo manutensaun,ita tau iha-ne’ebá, la presiza AC, só presiza surat tahan POS de’it ita bele foti osan ho efisiénsia liu,” nia akresenta.

Mekanismu seluk mak daudaun ne’e BNCTL hahú ona faze dezenvolve internet banking ne’ebé sei monta sistema sira hanesan mosan no seluk tan.nune’e kliente sira bele foti no halo transferénsia osan liuhosi telemovel sira-ne’ebé kliente sira utiliza ho efisiénsia liu.

Daudaun ne’e mákina ATM ne’ebé instala iha munisípiu Bobonaro mak hanesan, ida iha edifísiu BNCTL sukursál Maliana, lokaliza besik merkadu Maliana, suku Lahomea ho tipu P24 no ida seluk iha edifísiu administrasaun munisípiu Bobonaro iha suku Holsa ho tipu manuál ne’ebé sei konfigura hodi adere hotu ba P24.

Tuir dadus ne’ebé Agência Tatoli asesu iha jullu liubá, katak totál kliente BNCTL iha munisípiu Bobonaro utiliza kartaun ATM na’in-28,316 komposta hosi kategoria depozita orden, depozita labarik, poupansa migrante, depozita pesionista no idozu sira, la inklui funisonáriu sira-ne’ebé krédita BNCTL promove diálogu hodi dezenvolve ekonomia iha Bobonaro.

Jornalista : Sérgio da Cruz
Editór : Evaristo Soares Martins

iklan
iklan

Leave a Reply

iklan
error: Content is protected !!