iklan

HEADLINE, SAÚDE

Jullu to’o agostu, Sentru Saúde Laleia rejista pasiente ISPA na’in-311

Jullu to’o agostu, Sentru Saúde Laleia rejista pasiente ISPA na’in-311

Ilustrasaun Infesaun Respiratóriu Aguda. Imajen/Espesiál

DILI, 09 setembru 2022 (TATOLI)— Tuir dadus estatístika epidemoilojiku, hahú fulan jullu to’o agostu, Sentru Saúde Laleia, munisípiu Manatuto rejista pasiente Infesaun Vias Respiratóriu aguda (ISPA) na’in-311.

“Durante fulan rua ne’e, ita rejista moras ho némuru aas mak Infesaun Vias Respiratóriu aguda (ISPA) na’in-311, tuir fali mak tee-been ka diareia agudu 78, asidente trafégu 12, pneumonia 10, dengue haat, scabies rua, moras hadaet hosi relasaun seksuál (STI) ida, no mós tuberkuloze ida,”Xefe Sentru Saúde Laleia, Munisípiu Manatuto, José da Costa, hateten ba Agência TATOLI via telefónika, sesta ne’e.

Moras ISPA ne’e kauza mai hosi klíma hanesan fuma sigarru, rai rahun, ahi-suar, batéria no la disipliña uza máskara. Nune’e husu ba sidadaun sira atu uza nafatin máskara hodi halo prevensaun ba moras ISPA.

“Nune’e, ba moras tee-been agudu, maiória ema ki’ik no boot tanba dahuluk durante tinan ida populasaun Laleia ba kuru bee iha mota no daruak mak família sira prepara hahan la moos no bainhira han hahan ruma la fase liman,” nia afirma.

Tanba ne’e, nia husu ba populasaun Laleia bainhira hetan moras ruma bele, mai lalais fasilidade saúde sira hodi hetan atendimentu másimu hosi médiku sira.

“Ai-moruk sira sufisiente atu fó ba pasiente sira iha sentru saúde Laleia,” katak.

Daudaun ne’e, Profisionál Saúde iha Sentru Saúde Laleia na’in-30, hosi númeru ne’e Enfermeiru na’in-hitu, Médiku na’in-haat, Parteira tolu no tékniku aliadu na’in-16.

Jornalista : Felicidade Ximenes

Editór      : Florencio Miranda Ximenes

iklan
iklan

Leave a Reply

iklan
error: Content is protected !!