iklan

NASIONÁL, HEADLINE, KAPITÁL

Uma-kain 21,6% iha territóriu partisipa ona sensu populasaun 2022

Uma-kain 21,6% iha territóriu partisipa ona sensu populasaun 2022

Diretór Jerál Estatístika, Élias dos Santos Ferreira. Imajen Tatoli/Francisco Sony

DILI, 10 setembru 2022 (TATOLI)—Governu liuhosi Diresaun Jerál Estatístika (DGE, sigla portugés) Ministériu Finansa (MF) rejista ona uma-kain 21,6% iha territóriu tomak iha ámbitu sensu populasaun no uma-kain 2022.

“Ein jerál, dadus ne’ebé tama to’o ohin tuku 09:00, iha uma-kain 68.115 mak rejistu ona, konta ho populasaun 313.692, ne’ebé data ne’e kada minutu sempre haruka mai. Tanba ne’e, ha’u hanoin bainhira ita haree ba persentajen ne’ebé iha kuaze halo ona 21,6% iha territóriu laran tomak,” Diretór Jerál Estatístika, Élias dos Santos Fereira, informa iha ninia knaar fatin, Caikoli, sabádu ne’e.

Sensu populasaun no uma-kain 2022 realiza iha loron 05 setembru 2022 iha territóriu laran tomak, maibé iha Dili hahú iha loron 07 ho razaun loron 05 setembru simu kardeál foun no loron 06 setembru halo misa ba kardeál foun iha Tasi Tolu.

Notísia relevante: Sensu populasaun 2022 iha Dili adia ba loron 07 setembru

DGE rasik halo ona entrevista ba Ministru no Vise-Ministru Finansa hodi fó mensajen ba populasaun atu partisipa iha sensu ne’e.

“Aban ami sei halo entrevista ba altu nível sira, liuliu Prezidente Parlamentu Nasionál. Nune’e, semana oin ami iha ona kontaktu ho altu nível sira hanesan eis titulár sira, Prezidente Repúblika no Primeiru-Ministru, nune’e bele fó mensajen ba populasaun tomak hodi partisipa iha sensu,” nia akresenta.

Diretór ne’e konsidera, sensu ne’e importante tebes ba país atu hatene totál atuál populasaun, hela fatin, eskola no seluk tan.

“Durante iha sensu ita la’o di’ak, maibé hanesan tékniku ami mós hetan problema balun iha munisípiu, dahuluk ita hotu hatene la’ós problema foun iha Timor, tanba dala barak sira finaliza tiha sensu, maibé atu haruka data mai dala ruma internet la’o lentu liu, entaun sira tenke buka fatin ne’ebé internet iha, nune’e bele haruka dadus mai iha nasionál,” Diretór haktuir.

Aleinde ne’e, iha entrevistadór no supervizór balun mak rejigna-an tanba hetan serbisu seluk, tanba ne’e semana oin ekipa téknika sira tuur hamutuk hodi foti solusaun.

Tuir planu DGE sensu populasaun ne’e ramata iha loron 05 outubru 2022, tanba ne’e kada loron sempre halo evoluasaun ba dadus ne’ebé tama.

“Nune’e bele hatene to’o loron 05 outubru kada munisípiu nia persentajen hira mak hotu, sekarik balun la hotu, ami bele halo polítika ida atubele finaliza serbisu, tanba populasaun Timor-Leste hotu tenke konta mós iha sensu ne’e,” nia dehan.

Antes ne’e, Sensu populasaun iha tinan 2015 rejista populasaun Timor-Leste hamutuk 1.167.242 kompostu hosi mane 588.561 no feto iha 578.681, enkuantu bazeia ba sensu tinan 2010 rejista populasaun territóriu tomak hamutuk 1.066.409 kompostu hosi mane 544.198 no feto 522.242, ne’ebé hatudu katak durante tinan-lima nian laran populasaun aumenta 100.833.

Jornalista   : Nelia Fernandes

Editora        : Julia Chatarina

iklan
iklan

Leave a Reply

iklan
error: Content is protected !!