DTP Baucau husu utilizadór propriedade estadu kumpre devér arrendamentu
BAUCAU, 12 setembru 2022 (TATOLI) – Servisu Munisipál Diresaun Terra no Propriedade Baucau husu komunidade utilizadór proriedade uma no rai estadu atu kumpre devér arrendamentu.
Diretór Servisu Munisipál Diresaun Teras no Propriedade, Raimundo de Jesus Barros, esplika, daudaun ne’e kontinua identifika no halo levantamentu propriedade estadu hodi kontinua ba prosesu kontratu arrendamentu.
“Husu ba komunidade ne’ebé hala’o hela kontratu arrendamentu atu kada fulan kontinua selu tuir kontratu atu labele hetan multa nune’e prosesu la’o normal,” Diretór Terra Propriedade Munísipiu Baucau informa ba Tatoli iha Vila Nova, segunda ne’e.
DTP kontinua identifika no notifika ba arrendadór sira-ne’ebé utiliza rai no uma estadu hosi tinan 2013 la selu atu komesa kumpre devér no halo renovasaun ba dokumentu kontratu.
Ekipa tékniku DTP Baucau kontinua halo identifikasaun ba propriedade estadu maibé ladún másimu tanba hasoru difikuldade iha terrenu relasiona ho ekipamentu no transporte.
“Ita nafatin la’o-tuir lei ne’ebé iha katak rai estadu nian nafatin regulariza, bainhira la aseita ita hato’o ba Ministériu Públiku atu prosesa,” Raimundo Barros akresenta.
DTP rejista kontratu hamutuk na’in-79 kompostu arrendadór na’in-35 mak kumpre devér selu arrendamentu propriedade estdadu, enkuantu na’in-44 mak hahú hikas selu arandamentu hafoin DTP notifika ba utilizadór sira.
DTP Baucau rasik durante tinan-2022 hosi fulan-janeiru too agustu rekolla taxa estadu hamutuk rihun $16.442.
Kontratu arrendamentu no utilizasaun patrimóniu estadu bazea ba lei númeru 1/2003, lei númeru 13/2013 kona-ba titulariza bem-moves, dekretu-lei númeru 09/2014 kona-ba arrendamentu ne’ebé kompleta hotu ona kona-ba norma regulár eziste hosi tinan 2003 to’o VIII Governu Konstitusionál prodús tán norma diploma legál kona-ba rai.
Jornalista : Natalino Belo
Editór : Evaristo Soares Martins
