Ai-moruk tipu 257 hahú mamuk iha armazén SAMES
DILI, 13 setembru 2022 (TATOLI)—Diretór Ezekutivu Servisu Autonómu Medikamentu no Ekipamentu Saúde (SAMES), Santana Martins, informa estoke ai-moruk ho tipu 275 ne’ebé ekivalente ho 52%, mak mamuk ona iha armazén nasionál.
“Tipu ai-moruk enjerál ne’ebé ita iha hamutuk 526, husi númeru ne’e tipu 275 (52%) mak mamuk ka laiha, tipu ai-moruk ne’ebé daudaun disponivel iha armazein hamutuk 251 (48%),” dehan Santana Martins ba Agência TATOLI iha nia kna’ar fatin, Kampu-Alor, tersa ne’e.
Estoke ai-moruk ho tipu 275 ka 52% ne’ebé mamuk, nia dehan aprezenta ona ba Ministériu Saúde atubele fó autorizasaun hodi loke konkursu públiku ba halo akizasaun.
“Ami aprezenta ona ba Ministériu Saúde atu halo akizisaun ba ai-moruk tanba estoke mamuk ne’e difikulta tebes ba fasilidade saúde sira atu halo tratamentu ba pasiente sira,” nia afirma.
Estoke ai-moruk vitál hamutuk tipu 99, hosi númeru ne’e estoke mamuk hamutuk 34 ka 12% no tipu 65 ka 88 % mak disponivel hela.
Kona-ba estoke ai-moruk ensensiál hamutuk tipu 231, hosi ne’e estoke ne’ebé laiha hamutuk 122 ka 56% no estoke disponivel hamutuk tipu 109 ka 44%. Enkuantu ai-moruk nesesáriu iha tipu 104, maibé tipu 56 ka 80% mak laiha no tipu 48 ka 20% mak disponivél hela.
Iha tinan 2022, SAMES prevee Orsamentu hodi kompra medikamentu no ekipamentu saúde hamutuk millaun $5.6
“Ai-moruk sira ne’ebé mak laiha ne’e prejudika bo’ot ba fasilidade saúde, nune’e ami esforsu másimu hela atu delibera ai-moruk iha Portu Dili atu ita halo distribuisuan lalais ba fasilidade saúde sira iha territóriu nasionál,” nia afirma.
Durante ne’e, SAMES hasoru difikuldade ba prosesu produsaun ai-moruk hosi fábrika sira tanba halo operasionál loron sorin de’it hodi halo atrazu iha produsaun, nune’e difikulta kompaña sira ne’ebé mak halo akizasaun ba ai-moruk sira mós atrazu hotu.
Probelma seluk, nia dehan ai-moruk sira ne’e la autoriza atu tula ho aviaun, maibé tenke tula ho ró liuhosi Malázia hafoin mai transporta mai Timor-Leste.
“Ida seluk ami hasoru mak folin kontentór sa’e maka’as, ne’ebé prejudika ba ai-moruk sira ne’e tama tarde iha Timor-Leste,” nia esplika.
Jornalista : Felicidade Ximenes
Editór : Florencio Miranda Ximenes
