Top

Lia-na’in RAEOA entusiazmu simu ró Success ho tradisaun kulturál

Lia-na'in RAEOA simu ró Succes ho tradisaun kultura Oé-Cusse. Imajen Tatoli Abílio Elo Nini.

OÉ-CUSSE, 13 setembru 2022 (TATOLI)—Komunidade hamutuk ho autoridade komunitária no lia-na’in sira iha Rejiaun Administrativa Espesiál Oé-Cusse Ambeno (RAEOA) entusiazmu simu ró Success ho tradisaun kultura Oé-Cusse nian.

Tuir observasaun Agência Tatoli, katak lia-na’in sira simu transporte marítima ne’e hahú ho dadolin, hodi husu matak malirin ba lulik no bei-ala sira hodi husu tulun, nune’e transporte marítima ne’e la’o ho susesu no mós simu ho bidu tradisionál.

Nune’e mós, hetan ona bensaun hosi parte Igreja Katólika, liuhosi Padre Pároko Igreja Nossa Señora Dorosariu Numbei Oé-Cusse, Albino Marques SDB.

Istorikamente dato hosi suku Bobometo, sub-rejiaun Oésilo, Baptista Tafin, orgullu tanba Oé-Cusse nia oan rasik ho inisiativa hola transporte marítima hodi fasilita povu Oé-Cusse nia preokupasaun kona-bá transporte tasi nian.

“Ohin loron istória foun ba povu Oé-Cusse, tanba nia oan rasik hola ona ró Succes. Ida-ne’e hanesan rikusoin boot ba povu Oé-Cusse, atu ajuda transporta ba Dili no Oé-Cusse. Ita hotu husu ba bei-ala sira, atu fó matak malirin mai ita hotu, atu nune’e ita-nia ró ne’e bele la’o ho susesu,” Baptista Tafin, ko’alia iha dadolin, iha ámbitu lansamentu operasaun viajen dahuluk, iha portu Kitahara Mahata, Oé-Cusse, segunda ne’e.

Tuir nia, dezde tempu portugés to’o independénsia, kada tinan povu Oé-Cusse tanis no halerik beibeik kona-bá transporte marítima nian, maibé ema ida nunka rona, nune’e iha tinan 2022 ne’e, istória boot ba povu Oé-Cusse, tanba iha ema ida hola risku atu responde situasaun tristeza ne’e.

Jestór Nítibe, Teodoro Sila, reprezenta komunidade agradese ba empreza Irmão Timor, tanba ho esforsu tomak bele rezolve povu Oé-Cusse nia preokupasaun ne’ebé enfrenta tinan barak ona.

“Ami hanesan autoridade nível lokál, ita-nia prezensa ba ró Succes ne’ebé empreza Irmão Timor hosi Oé-Cusse oan ho nia inisiativa ne’e, orgullu boot ba povu Oé-Cusse tanba iha impaktu di’ak no fó vantajen barak tebes, tán ne’e nu’udar komunidade no hanesan pasajeiru, ami sente kontenti tanba bele ona fasilita ita-nia komunidade tomak bainhira liuliu hosi Oé-Cusse ba Dili no Atauro,” nia orgullu.

Maske iha limitasaun maibé ho prezensa transporte ne’e, hatudu katak Oé-Cusse hahú hakat tán pasu ida ba prosesu dezenvolvimentu ba Timor-Leste espesiálmente ba rai ketan Oé-Cusse, Ambeno.

Entretantu, finansiamentu ba ró Success hamutuk $101, 800.00, ne’ebé hola hosi empreza Irmão Timor Unipesoál Lda ho perseria ho Banku Nasionál Komérsiu Timor-Leste (BNCTL, sigla portugés).

Notísia relevante: Prezidente Autoridade RAEOA lansa operasaun ró Succes


Jornalista   : Abílio Elo Nini
Editór         : Evaristo Soares Martins

Publisidade

Leave a Reply

Latest Post

error: Content is protected !!