iklan

NASIONÁL, HEADLINE, KAPITÁL

Ekipa MAP desloka ona ba Jaco rezolve fornesimentu bee ba rusa

Ekipa MAP desloka ona ba Jaco rezolve fornesimentu bee ba rusa

Bibi Rusa hadau malu bee iha illa Jaco, kuarta (11/12/2019). Imajen/Jogerjo Guterres

DILI, 15 setembru 2022 (TATOLI)—Diretór Jerál Floresta Kafé Planta Indústria iha Ministériu Agrikultura no Peska (MAP), Raimundo Mau, hateten, ekipa desloka ona ba illa Jaco, munisípiu Lautém hodi rezolve fornesimentu bee ba rusa sira.

“Haree ba situasaun ne’ebé akontese, ohin ekipa MAP desloka ona ba illa Jaco hodi koodena ho bombeiru Lautém atu lori bee ba tanke bee iha Jaco,” Diretór informa ba Agência Tatoli, iha ninia knaar fatin, Caicoli, kinta ne’e.

Antes ne’e guarda florestál sira ne’ebé destaka iha illa Jaco identifika rusa-oan tolu mate tanba falta bee.

“Agora fulan-setembru ba novembru hanesan tempu bailoron. Ita-nia depózitu bee iha Jaco hotu, la konsege fornese ba tempu ne’ebé rusa presiza, entaun rusa-oan ne’ebé mate deskonfia kauza hosi bee menus,” nia akresenta.

Notísia relevante: MAP halo armazenamentu rai udan-been ba rusa sira iha Jaco

Parte MAP antes ne’e halo ona armazenamentu rai udan-been ba rusa sira, nune’e hein udan-been monu rai mak enxe bee ba armazenamentu.

“Kapturasaun udan ne’ebé ita halo ho kapasidade profil litru 20.000, bainhira tempu udan nakonu, ita sura tiha ona katak bailoron maka’as fulan-haat ka lima tanke profil ne’ebé iha bele atende rusa sira,” nia tenik.

Daudaun ne’e, asaun imediata urjente ne’ebé daudaun MAP halo mak atu kontinua fornese bee ba rusa sira to’o udan monu.

“Kondisaun seluk mak ita iha tanke profil iha Walu no ita iha berro ida lori bee hosi Walu bá Jaco, loron-loron maibé bero kiik entaun lalin dala-ida masa litru haat ka lima hodi enxe bidon no fatin ne’ebé ita prepara tau bee nian, konta ita lori bee hosi Walu bá enxe de’it basia no bidon nakonu hamutuk litru 80 maibé loron ida de’it bele hotu,” nia esplika.

Tuir Diretór, durante ne’e problema ne’ebé mosu iha terrenu mak falta ema kontrolu iha Jaco hodi haree bee menus no maran tanba guarda florestál iha Tutuala iha ida de’it no tinan ne’e mak foin aumenta tan ida.

“Ita-nia kalkulasaun, katak rusa loron ida hemu bee litru lima, estimasaun totál ba rusa iha 300 to’o 400, bainhira sira mai tama dala-ida hemu bee, sira mai grupu boot tolu, grupu ida bele iha rusa 40 to’o 60. Entaun sira ne’e mai bainhira basia sira ne’ebé ita tau bee ne’e ho kuantidade bee la to’o rusa sira ne’ebé kiik ka moras hemu ikus, dala ruma sira la hetan bee kontinua sofre. Bainhira ita tarde loron-ida ka rua lori bee ba sira maka bele akontese kondisaun krítiku,” nia salienta.

Jornalista   : Arminda Fonseca 

Editora        : Julia Chatarina

iklan
iklan

Leave a Reply

iklan
error: Content is protected !!