MS: presiza tau importansia fó susubeen inan ba bebé
DILI, 15 setembru 2022 (TATOLI)— Ministériu Saúde (MS) liuhosi Diresaun Nasionál Saúde Públika, hala’o semanáriu ba selebrasaun semana mundiál susubeen inan.
Hodi aprezenta situasaun nutrisaun globál no nasionál, nune’e mós aprezentasaun kona-ba importánsia hosi susubeen inan ba bebé, risku uza susu formula no bibiron ba bebé.
“Atu hatete katak investimentu boot iha ita-nia rai mak ita-nia oan sira, oinsa ita atu bele garantia no proteje oan nomós inan sira. Se ita koalia kona ba nutrisaun ita koalia kona-ba importansia inan nia susuben hahú kedas husi Inan isin rua prosesu naruk ida atu to’o bebé moris. Tanba ida ne’e mak hahú inan-isin-rua trimestre pimeiru inan sira tenke hakbesik ba fasilidade Saúde.” hatete Diretóra Jerál Prestasaun Saúde, Odete Viegas iha palásiu Cinzas, Caicoli, Díli.
Atu bele hetan atendimentu saúde ne’ebé mak apropriadu, mak prosessu to’o fulan sia to’o bebé moris, hafoin bebé moris hosi zero to’o tinan rua, tenke hetan tratamentu espesiál, ida ne’e la’os ba bebé de’it, maibé ba inan fó susu sira.
Prioridade aas liubá aman sira no lnan sira atu hatene katak konsiénsia hosi-oan ida moris mai ne’e nia obietivu finál atu sai oinsá, entaun mai ho pakote integradu ida.
“Ha’u hakarak atu fó enfaze de’it ba inan-aman sira katak ita-nia oan sira mak sai futuru ba rai ida-ne’e no sai futuru ba Nasaun ida-ne’e, entaun presiza prepara oan sira-nia kondisaun hahú husi planeamentu familiar,’ nia afirma.
Ministériu Saúde hahú kedas husi Primeiru Governu to’o mai iha Oitavu Governu fó prioridade ba iha saúde buat barak tebtebes, maibé saude maternu infantil no nutrsaun sai nafatin prioridade ne’ebé mak aas.
“Ida ne’e atu fó Bens Star ba ita-nia populasaun liu-liu ba ita-nia oan sira ne’ebé maka foin moris,” katak.
Iha fatin hanesan reprezentante Organizasaun Mundiál Saúde iha Timor Leste, Dongbao Yu, apela ba Governu, parseiru, sosiedade sivil no setór privadu sira atubele intensifika hodi investe iha politika no programa sira ba apoiu susubeen inan liuhosi ekipa profisionál saúde no nutrisionista ho abiliddae nesesariu hodi fornese akonselamentu kualidade no apoiu prátiku ba inan sira atubele fó susubeen ho susesu.
OMS deklara katak susuben formula ne’ebé mak la nesesáriu no iha evidénsia hatudu katak susuben formula iha merkaduria sira ne’ebé mak promosaun iha kompaña sira kontein masin midar barak no la saudavel no bele prevene dezenvolvimentu labarik sira nian, hodi hamosu moras ba bebé nia saúde.
Jornalista : Felicidade Ximenes
Editór : Florecio Miranda Ximenes
