DILI, 16 setembru 2022 (TATOLI)—Seguransa Guarda Florestál iha illa Jaco, munisípiu Lautém, Lino Soares, hateten, rusa balun mate tanba laiha hahán hanesan ai-tahan no du’ut atu konsumu.
“Ita hasoru difikuldade falta hahán ba rusa no halo rusa rua mesak aman hotu mak mate. Ida-ne’e la’ós tanba de’it bee mak laiha maibé sira mate kauza tanba hamlaha, tanba ai-tahan no du’ut ne’ebé sira konsumu menus tanba impaktu hosi bailoron,” Seguransa Guarda Florestál iha illa Jaco ba Agência Tatoli, via telefónika, sesta ne’e.
Nia dehan, bee sei iha oituan no horiseik empreza lokál balun oferese tan bee hodi enxe ba profil litru 2.000 iha Jaco no ohin guarda florestál rasik husu komunidade lokál ajuda tan bee enxe ba profil litru 2.000 inklui bidon mamuk iha Jaco.
Notísia relevante: Ekipa MAP desloka ona ba Jaco rezolve fornesimentu bee ba rusa
Daudaun ne’e, nia parte seidauk hasoru ekipa ruma hosi nasionál atu haree kondisaun rusa nian.
“Agora buat ne’ebé ha’u husu ba Governu mak tenke mai haree kondisaun rusa sira, nune’e ita buka solusaun ba hahán, tanba foin setembru de’it ai-tahan no du’ut ne’ebé rusa atu konsumu ne’e menus ona,” nia nia tenik.
Jornalista : Arminda Fonseca
Editora : Julia Chatarina
