Francisco Branco asume tan kargu nu’udar Embaixador TL ba Angola-Áfrika do Sul
DILI, 19 setembru 2022 (TATOLI)—Atuál Embaixadór Timor-Leste (TL) ba Mosambike, Francisco Branco, segunda ne’e, asina termu pose ba Embaixadór hosi Prezidente Repúblika asume tan kargu nu’udar Embaixadór Timor-Leste ba Ángola no Áfrika do Súl.
Notísia Relevante: Governu propoin kargu embaixadór estraordináriu iha Reinu Unidu ba PR
“Misaun diplomátika Repúblika Timor-Leste iha Mosambike tuir desizaun Konsellu Ministru (KM) akumula mós misaun diplomátika ba Angola ho Áfrika do Súl, no kona-ba mandatu depende desizaun,” Embaixadór Francisco Branco hateten ba jornalista sira hafoin simu pose hosi Xefe Estadu, José Ramos Horta, iha Palásiu Prezidensiál Nicolau Lobato, Bairru Pite.
Nia hatutan, iha tempu ne’eba iha lapsu nune’e atu prinxe lapsu ne’e presiza fali Prezidente Repúblika dekreta fila-fali Áfrika do Súl ho Angola hanesan misaun diplomátika ne’ebé TL ninia rezidénsia iha Mosambike halo kobertura mós.
Áfrika do Súl nasaun importante iha G20 no Angola mós importante no uluk TL iha misaun diplomátika ba nasaun rua ne’e, maibé Timor-Leste kansela tiha nia misaun diplomátika iha nasaun rua.
Diplomata Timoroan ne’e defende katak, durante misaun sei halo diplomásia diplomásia ekonómia tuir polítika Estadu oinsá buka dada investidór mai rai-laran investe iha setór turizmu, infraestrutura no seluk tan.
Iha serimónia asina termu pose ne’e, Xefe Estadu husu atu servisu di’ak liután hodi lori investidór rai-li’ur mai investe iha Timor-Leste.
Jornalista : Nelson de Sousa
Editór : Cancio Ximenes
