SAMES hahú distribui ai-moruk ba fasilidade saúde sira

DILI,19 Setembru 2022 (TATOLI)— Diretór Ezekutivu Servisu Autónomu Medikamentu no Ekipamentu Saúde (SAMES), Santana Martins, hateten, hafoin delibera ai-moruk ho tipu 74 iha Portu Dili, hala’o kedan distribuisaun ba fasilidade saúde sira iha territóriu nasionál inklui Hospitál Nasionál Guido Valadares (HNGV), hodi fó atendimentu ba pasiente sira.

SAMES halo akizasaun ai-moruk ho tipu 74 hamutuk kontentór haat hosi iha nasaun Índia, Indonézia, Srilanka no Tailándia.

“Kompaña Betesda, Istana Farmazes nomós Moris Foun mak hatama ai-moruk hirak ne’e, nune’e ita halo ona prosesu no liberta kontentór husi Alfándega, nune’e ita halo distribuisaun ba fasilidade saúde sira,” Diretór Ezekutivu SAMES hateten iha nia knar-fatin Kampu-Alór, segunda ne’e.

Maibé, nia dehan ai-moruk tipu hitu hosi kompaña Moris Foun mak delibera hosi Portu Dili tanba tuir sira nia pedidu sira rasik mak halo prosesu.

“Semana ne’e, ami  distribui ona tipu esensiál balun ba Hospitál Nasionál Guido Valadares  (HNGV), ospitál rejionál  sira iha munisípiu hodi bele fó atendimentu ba pasiente sira,” nia afirma.

Maske, nia dehan ditribuisaun ai-moruk hirak ba fasilidade saúde ho kuatidade ki’ik, tanba difikuldade merkaduria internasionál, maibé bele fasilita pesoál saúde sira hodi atende pasiente sira.

SAMES halo esforsu oras 24, maibé estoke nasionál  ne’ebé mak ladun seguru  no  afeta ba atendimentu sira iha fasilidade saúde sira.

“Tanba ne’e, ami buka  atu asegura  estoke mamuk,   maibé ami mos hanoin katak ai-moruk ne’ebé ami sosa ne’e  kuantidade  labele rezolve ita nia nesesidade tanba orsamentu ne’ebé mak SAMES  iha tinan ne’e milllaun $6,5, nune’e ita labele kobre hotu,” nia esplika.

Jornalista : Felicidade Ximenes

Editór       : Florencio Miranda Ximenes