MS haruka ona ai-moruk tipu lima ba Austrália hodi teste kualidade
DILI, 20 Setembru 2022 (TATOLI)— Xefe Departamentu Jestaun Autorizasaun no Introdusaun Medikamentu liuhosi Diresaun Nasionál Farmasia no Medikamentu iha Ministériu Saúde, Teodoro de Jesus, informa haruka ona ai-moruk tipu lima ba Laboratory Therapeutics Goods Administration Australia hodi hala’o teste kualidade.
“Laboratóriu therapeutics Goods Administration Australia, kontinua nafatin disponivél atu hala’o teste kualidade ai-moruk, tanba ne’e ita haruka ona tipu lima ba hanesan ampicillin, aspirin, bisoprolol, Glibenclamide, no oxytocina atu hala’o teste nia-kualidade,” Xefe Departamentu ne’e hateten ba Agência TATOLI iha nia kna’ar fatin Caicoli, Dili, tersa ne’e.
MS haruka ai-moruk tipu lima ne’e liuhosi Ajensia DHL no selu ho orsamentu $433 no sei rona fali rezultadu iha fulan-tolu nia laran.
Tipu ai-moruk sira mak ampicillin hanesan ai-moruk antibiotiku, aspirin ba moras fuan, bisoporol ba hipertesaun, Glibenclamide ba raan midar, oxytoci mak ai-moruk ajuda inan sira atu partu lalais.
Tipu ai-moruk lima ne’e sai hanesan amostra ne’ebé foti hosi kompañia Indonézia no Índia ne’ebé Governu Timor-Leste halo akizasaun
“Ai-moruk ne’e bainhira fábrika sira prodús, tenke halo ona teste nia-kualidade mak faan iha merkaduria, maibé ita nia hakarak teste tan dala ida tanba tuir dalan hasoru loron manas no rai kle’ur iha kontentór entaun ida ne’e mak ita halo tan teste para nia kualiddae nafatin iha ka lae,” katak nia.
Nia dehan la’ós teste nia kualidade ne’e signifika ai-moruk sira tama mai ne’e aat hotu, maibé hakarak asegura fali ninia kualidade sira ne’e.
Kuantidade ai-moruk ne’ebé haruka ba Laboratory therapeutic Goods Administration Australia ne’e kompostu husi ai-moruk aspirin hamutuk tablet 100, Glibenclamide tablet 100, bisoprolol tablet 84 no ampicillin vial 40 inklui oxytocin tablet 40.
Jornalista : Felicidade Ximenes
Editór : Florencio Miranda Ximenes
