Autoridade RAEOA to’o ona iha sidade Kefamenanu
KEFAMENANU, 21 setembru 2022 (TATOLI) – Ekipa delegasaun hosi Rejiaun Administrativa Espesiál Oé-Cusse Ambeno (RAEOA) liderada Leonia da Costa Monteiro, kuarta ne’e to’o ona iha sidade Kefameanu hodi partisipa aniversáriu sidade refere.
Administradór Timur Tengah Utara (TTU), Juandi David, akompaña ho Adjuntu Administradór, Euzabios Binasasi, entuziasmu simu delegasaun hosi Autoridade Rejiaun Administrativa Espesiál Oé-Cusse Ambeno (RAEOA), ne’ebé xefia hosi Adjunta Prezidente Autoridade, Leonia da Costa Monteiro hamutuk ho Sekretáriu Rejionál ba Asuntu Agrikultura, José Eta no Sekretáriu Rejionál ba Asuntu Turizmu Komunitária, Pedro da Silva Boquifai.
“Dahuluk, ha’u lori Governu Indonézia, espesiál TTU agradese boot ba Autoridade RAEOA hamutuk ho delegasaun tomak, tanba konsege to’o ami-nia fatin hodi partisipa atu komemora loron aniversáriu tinan-100 sidade Kefamenanu,” Administradór TTU, Juandi David, ko’alia iha iha serimónia simu delegasaun iha edifisiu TTU, Kefamananu.
Juandi David, orgullu tanba konvite ne’ebé hato’o ba Autoridade RAEOA ho respeita no konsidera, nune’e iha loron segunda liuba, delegasaun komposta hosi grupu produtu lokál to’o uluk, no ohin simu tán delegasaun hosi autoridade hanesan nasaun viziñu espesiál liu ba rejiaun Oé-Cusse.
“Ida-ne’e maka ami-nia situasaun no kondisaun iha TTU, ami espera ohin no iha futuru, ba vizitasaun ne’e ho objetivu atu komemora loron aniversáriu sidade Kefamenanu, bele sai amizade hodi hametin relasaun entre komunidade iha liña fronteira Oé-Cusse ho Kefamenanu,” nia afirma.
Adjunta Prezidente Autoridade RAEOA, Leonia da Costa Monteiro, reprezenta Autoridade RAEOA, agradese ba Governu TTU tanba konvida Autoridade RAEOA hodi partisipa iha komemorasaun loron aniversáriu tinan-100 sidade Kefamenanu.
Iha biban ne’e, Leonia Monteiro, informa, tuir loloos Prezidente Autoridade RAEOA, Arsénio Paixão Bano sei hola parte iha selebrasaun ida-ne’e, maibé tanba iha asuntu servisu seluk, presiza atende iha nasaun Portugál kona-bá investimentu transporta marítima nian.
“Ha’u reprezenta ekipa delegasaun hosi Governu Rejionál espesiál ba rejiaun Oé-Cusse, ha’u hakarak hato’o agradese ba Governu TTU, tanba ohin simu ami ho di’ak tuir tradisaun kultura TTU nian, ” nia orgullu.
Entretantu, ekipa delegasaun hosi autoridade RAEOA lidera hosi Adjunta Prezidente Autoridade, Leonia da Costa Monteiru, akompaña hosi Sekretáriu Rejionál ba Asuntu Agrikultura, José Eta, no Sekretáriu Rejionál ba Asuntu Turizmu Komunitária.
Notisia relevante: Prezidente Autoridade RAEOA despede ho ekipa delegasaun dezloka ba Kefamenanu
Jornalista: Abílio Elo Nini
Editór Evaristo Soares Martins
