iklan

DESPORTU, DILI, HEADLINE

Laiha treinadór, FFTL seidauk prepara jogadór partisipa kopa Mitsubishi

Laiha treinadór, FFTL seidauk prepara jogadór partisipa kopa Mitsubishi

Logotipu FFTL no Bandeira RDTL. Imajen/FFTL

DILI, 21 setembru 2022 (TATOLI)— Diretór Tékniku Federasaun Futeból Timor-Leste (FFTL), Gaspar Quintão, informa daudaun ne’e, seidauk prepara ba jogadór futeból selesaun nasionál seniór hodi ba patisipa Football Federation (AFF) Mitsubishi Electric CUP 2022, iha novembru ne’e, tanba laiha treinadór.

“Ita seidauk halo preparasaun tanba seidauk iha treinadór. Kuandu treinadór iha ona foin mak nia hili jogadór sira, maibé lista provizóriu ba ita iha jogadór lubuk ida, mak sira U-23, U-20 no U-19, maibé tempu besik iha ona treinadór mak nia hili,” dehan Gaspar ba Agência TATOLI iha edifisiu FFTL, Dili, kuarta ne’e.

Notísia relevante: La simu saláriu, Fabio rejigna-aan hosi Treinadór futeból selesaun nasionál

Iha tempu besik, Ezekutivu FFTL hala’o reuniaun hodi deside ka hili treinadór foun atu sai treinadór ba jogadór sira iha selesaun nasionál seniór no U-23.

“Jogu AFF ne’e sei hala’o tinan ne’e no Timor -Leste sei hala’o jogu kualifikasaun hasoru Brunei Darussalam bainhira manán mak foin tama ba faze grupu. Hasoru malu entre Timor- Leste ho Brunei iha novembru mai ne’e,” nia afirma.

Tuir nia, posibilidade boot FFTL sei mantein jogadór hirak ne’ebé antes ne’e joga ona iha eventu internasionál sira no sei bolu balun hosi Munisípiu hodi reforsa tan.

Federasaun Futeból Timor-Leste (FFTL), mós rekoñese durante fulan-lima, Treinadór Prinsipál Selesaun Nasionál Under 23 (U-23), ne’e la simu saláriu.

Treinadór ne’e seidauk simu saláriu tanba iha implikasaun hosi mudansa apoia finanseiru hosi AFC, nune’e implika pagamentu salariál ba treinadór sira nian, la’ós de’it Fabio, maibé iha mós treinadór na’in-tolu iha FFTL.

Entretantu, Prezidente Federasaun Futeból Timor-Leste (FFTL), Francisco Martins da Costa Pereira Jerónimo, hateten daudaun federasaun buka hela treinadór ida hodi troka treinadór selesaun nasionál, Fabio Maciel da Silva, ne’ebé mak rejigna-an ona foin lalais.

Prezidente FIFA klarifika liután katak treinadór Fabio ninia kontratu sei ramata iha dezembru 2022, maibé deside rejigna-an tiha.

“Nia rasik hakotu nia kontratu, ne’e mós problema tanba osan, la’ós ami mak lakohi selu, osan ne’e iha AFC, nia hakerek karta ba AFC no FIFA no fó ona resposta kona-ba prosesu. Sira hatene hela prosesu, maibé sira dala barak lakohi atu hatene ho prosesu sira ne’e, sira-nia hakarak maka osan iha oin, laiha entaun ameasa ho rejigna-an,” nia tenik.

Jornalista   : Hortencio Sanchez

Editór       :  Florencio Miranda Ximenes

iklan
iklan

Leave a Reply

iklan
error: Content is protected !!