EDUKASAUN, HEADLINE

Uma-kain ualu iha resintu Eskola EBC Bidau simu notifikasaun hosi SETP

Uma-kain ualu iha resintu Eskola EBC Bidau simu notifikasaun hosi SETP

Plaka Eskola Bidau Akadiru-hun. Imajen/Parlamentu

DILI, 22 setembru 2022 (TATOLI)–Okupante uma-kain ualu ne’ebé okupa fasilidade iha resintu Eskola Ensinu Báziku Sentrál (EBC, sigla portugés) Bidau Akadiru-hun, hetan ona notifikasaun hosi Sekretaria Estadu Terra no Propriedade (SETP) atu hamamuk ona arredór eskola iha loron-10 nia laran, hahú loron 20 to’o 30 setembru 2022.

“Iha notifikasaun ne’e sira husu ami tenke sai rasik, tanba ne’e sira fó tempu durante loron-10 nia laran, kuandu ami la kumpre desizaun tuir loron ne’ebé determina ona, maka sira sei mai hasai ami hosi fatin ne’e,” Justino de Jesus, nu’udar xefe família ne’ebé okupa fasilidade eskola, hateten ba Agência Tatoli, iha Eskola EBC Bidau Akadiru-hun, kinta ne’e.

Justino de Jesus, dehan, okupante sira bele kumpre desizaun maibé desizaun saida de’it maka Estadu hatún, husu atu konsidera netik sira-nia situasaun hodi lori bá fatin dignu.

“Baibain Governu atu muda komunidade hosi fatin ida bá fatin seluk sempre iha indemnizasaun, nune’e ami bele bá hela iha fatin seluk. Karik ami la hetan oinsá atu rekupera ekonomia família,” nia akresenta.

Notísia relevante: MEJD la prevee indemnizasaun ba komunidade okupa fasilidade eskola

Hosi família uma-kain ualu ne’ebé okupa arredór eskola, iha profesór na’in-ida de’it, seluk hanesan okupante uma-kain ho abitante 50 resin, ne’ebé okupa ona desde tempu krize polítiku.

Notifikasaun ne’ebé okupante sira simu, ninia tratamentu hanesan tantu ba profesór no abitante seluk tenke hamamuk arredór eskola, hafoin entrega hikas ba Governu liuhosi Ministériu Edukasaun Juventude no Deportu (MEJD).

Jornalista   : Tomé Amado

Editora         : Julia Chatarina

iklan
iklan

Leave a Reply

iklan
error: Content is protected !!