MEJD planeia konstrui sala aula 400 iha 2023
BOBONARO, 23 setembru 2022 (TATOLI)-Ministériu Edukasaun, Juventude no Desportu (MEJD) planeia konstrui sala aula hamutuk 400 iha tinan 2023 hodi hadi’ak infraestrutura eskolár ne’ebé identifika ona kondisaun bázika ladi’ak ona.
Vise Ministru Edukasaun, Juventude no Desportu, António Guterres, hato’o promesa ne’e iha ámbitu diálogu nasionál entre oranizasaun sosiedade sivíl ho governu, ne’ebé realiza iha foho Loe-Lacu, área Poerema, aldeia Liabote, suku Meligo, postu administrativu Cailaco, munisípiu Bobonaro, kinta ne’e.
Notísia relevante: Governu sei hadi’a sala-de-aula 91 iha Ermera
“Ita-nia programa grande opsaun planu ninian, estudu viabilidade la’o hela, ne’ebé tinan oin ita prevee 400 sala aula tán, ita-nia lista sira iha ona, la’ós ida-ne’e de’it, ita-nia eskola sira-ne’ebé uluk halo liuhosi projetu pakote referendu ne’ebé ke kondisaun ita bele hateten presiza duni tenke tau matan,” nia hateten.
Maski nune’e, tinan ne’e liuhosi orsamentu jerál estadu implementa ona projetu ho kategoria tolu, ida hosi tranferénsia públika implementa projetu komunitária ne’ebé daudaun ne’ebé komunidade rasik mak hala’oo obra ne’e ih territóriu nasionál.
Enkuantu projetu rua mai hosi kapitál dezenvolvimentu no bens no servisu.
Nune’e mós fundu infraestrutura hirak-ne’e mós hetan apoia orsamentu hosi parseiru dezenvolvimentu sira hanesan UNICEF no governu Austrália.
Governante ne’e mós rekoñese eskola sira iha territóriu nasionál enfrenta problema barak hanesan bee-moos, maibé la’ós governu lakohi tau prioridade, maibé tenke kria ulun sala aula atu partsipa iha prosesu aprendizajen inklui moru protesaun eskola.
“Planu ida-ne’e fazeadamente, buat ne’e la’o beibeik, hein katak liuhosi serbisu ne’ebé ke ajuda hosi monitorizasaun no advokasia hosi sosiedade sivíl, nafatin atu hafanun períodu tuir mai atu kontinua nafatin ba sira-ne’ebé seidauk atinje iha mandatu VIII governu,” nia hateten.
Dezafiu seluk kona-bá fatin refeisaun eskolár, ai-han merenda eskolár estudante sira tuur de’it mós fatin laiha, ho nune’e iha OJE tinan 2023 sei haree mós ba kestaun ne’e.
Nia fó-sai katak, bioblioteka no laboratoriu mós durante ne’e sai problema, tanba atu rai livru de’it mós fatin la to’o, nune’e tenke butuk arbiru de’it iha fatin ida, entaun molok mandatu hotu sei kompleta preokupasaun hirak-ne’e.
Notisia relevante: MEJD sei submete projetu 189 ba ADN atu verifikasaun progresu fíziku
Jornalista: Sérgio da Cruz
Editór: Evaristo Soares Martins
