VIQUEQUE, 26 setembru 2022 (TATOLI)—Abitante ida sunu to’os iha aldeia Akadiru-hun, suku Dilór, postu Lacluta, munisípiu Viqueque, maizumenus tuku 11:30, segunda (26/09) hodi rezulta ahi han uma ida.
“Ohin akontese inséndiu iha aldeia Akadiru-hun. Abitante ida maka sunu to’os, hafoin anin lori afeta ba uma ida no ahi han moos sasán uma-laran, nein foti sai sasán ida. Vítima ho naran Marcelino Soares, maibé ida sunu to’os ne’e maka ha’u la hatene ninia naran,” Xefe suku Dilór, Jacinto Ximenes, hateten ba Agência Tatoli, via telefónika, segunda ne’e.
Tuir kronolojia, abitante ne’e sunu to’os hafoin ahi afeta ba ninia viziñu nia uma, hafoin uma-na’in laiha, entaun ahi hahú han dapur uma-talin ninia tatis kona uma-boot ninia kalen maka ahi boot ba tutan uma kioske.
“Ohin akontese hotu tuku 14:30 ha’u to’o kedas fatin akontesementu hodi rekolla dadus vítima ninia uma ne’ebé ahi han. Ha’u haree sasán uma-laran ida la salva. Vítima Marcelino nia uma ahi-han,” nia akresenta.
Notísia relevante: Ahi han uma-rua durante inséndiu iha aldeia Bahabunac Viqueque
Sasán uma laran maka hanesan televizaun, armáriu, estudante na’in-rua nia diploma, roupu inklui sasán sira seluk.
Hosi akontesementu ne’e, parte autoridade suku Dilór informa ona ba Protesaun Sivil munisípiu Viqueque nune’e aban ekipa sei halo verifikasaun iha fatin akontese inséndiu.
“Vítima Marcelino ho família hamutuk na’in-neen,” nia tenik.
Aleinde ne’e, autoridade husu komunidade tenke atensaun ba ahi tanba tempu bai-loron bainhira sunu ahi karik tenke ho kuidadu hodi labele fó impaktu ba fatin seluk.
Jornalista : Vitorino Lopes da Costa
Editora : Julia Chatarina
