Klínika Bairo Pite rejista 380 pasiente TBC
DILI, 27 setembru 2022 (TATOLI) – Hahú hosi janeiru to’o setembru, Klínika Bairo Pite rejista 380 pasiente moras tuberkuloze (TBC).
“Husi janeiru mai to’o agora ita rejista pasiente tuberkoloze hamutuk 380-resin mak mai halo tratamentu saúde iha ne’e”, Diretór Ezekutivu Klínika Bairo Pite, Inácio dos Santos, dehan ba TATOLI iha nia kna’ar fatin.
Nia informa, pasiente tuberkoloze ne’ebé durante halo tratamentu saúde iha Klínika Bairo Pite, sira ne’e maioria mai husi Dili, Ermera, Bobonaro no Baucau.
“Ita haree númeru TBC kontinua iha tanba ne’e husu ba populasaun sira karik iha ema ruma mak pozitivu tuberkoloze bele hakbesik ba fasilidade saúde sira hodi halo atendimentu sedu”, adianta.
Diretór preokupa katak pasiente TBC lakon sira nia tratamentu hanesan foin lalais pasiente ida husi munisípiu Bobobaro foin tratamentu loron neen maibé halai lakon.
“Agora daudaun ekipa saúde sira buka tuir atu halo fali tratamentu rutina ba nia atu nune’e la bele da’et ba família ka vizinñu sira ne’ebé mak besik”, salienta.
Nia dehan, kona ba medikamentu sira atu halo tratamentu ba moras TBC katak sufisiente, tanba apoiu másimu husi Ministériu Saúde liuhosi Servisu Autónomu Medikamentu Ekipamentu Saúde (SAMES).
Pesoál saúde hirak ne’ebé fó atendimentu ba pasiente sira iha Klínika Bairo-Pite hamutuk 60-resin.
Jornalista : Felicidade Ximenes
Editór : Zezito Silva
