APA Bobonaro identifika ona rai loke kampu futeból ba joven suku 18
BOBONARO, 28 setembru 2022 (TATOLI)-Administradór postu administrativu (APA) Bobonaro, munisípiu Bobonaro, Juvinál Leto-Mau dos Santos, identifika ona rai atu loke kampu futeból permanente ba joven hosi suku 18 atubele promove foin sa’e sira-nia talenta iha área desportiva.
Administradór postu ne’e hateten, planu atu loke kampu futeból foun ne’e, tanba kampu tuan ne’ebé daudaun ne’e joven sira utiliza iha Boobonaro vila besik kedas áreador eskola, nune’e bainira iha kompetisaun ruma difikulta estudante sira-nia prosesu aprendizajen.
Nia haktuir, durante ne’e laiha kampu futeból permanente joven sira iha postu administrativu Bobonaro, nune’e hamenus foin sa’e sira+nia vontade atu aprende bola, maske balu iha talenta ne’ebé di’ak hakarak sai futebolista profisionáll.
Notísia relevante: Klubu Sose Mucu kampiaun Oe-leu Cup époka 2021
“Rai ne’e ninia lokalizasaun ne’e iha bairru Grotu, aldeia Tai-Mea, hau iha ona planu tenta hasoru malu ho lia-na’in balun, atu oferese rai ne’e, maibé problema maka rai refere la’ós uma lisan ida nian de’it, kuaze tolu kedas,” nia informa ba Tatoli, iha Maliana, kuarta ne’e.
Maibée nia hatutan, rai refere daudaun ne’e iha hela faze negosiasaun nia laran ho lia-nain uma-lisan tolu kompostu hosi Bachugatál, Magaleat no Pu-Noet, maibé dalaruma lia-na’in no uma ulun sira laiha, tanba ne’e iha tempu badak sei kontinua esforsu halo aprosimasaun nune’e bele hetan solusaun.
Juvinál dehan, hafoin hetan konkordánsia ho uma-lisan tolu ne’e sei bolu Institu Jestaun no Ekipamentu, Insititútu Públiku (IGE,I.P, sigla portugés), atu mobliza ekipamentu pezadu nune’e ita tempu badak joven foin sa’e sira bele halao ona atividade desportu nian.
“IGE agora sei iha hela suku Ai-Asa, kala loron tolu ka haat ida tán sira bele muda sa’e mai ona suku Mali-Lait, tanba ne’e maka hanesan Bobonaro oan, Mailait oan no administradór postu, ha’u sei halo esforsu,”nia dehan.
Postu administrativu Bobonaro iha aldeia 63, suku 18 ho totál abitante tuir dadus estatistika 2022 hamutuk na’in 32,581, kompostu hosi feto 14,661, mane 17,920, ho totál xefe família 6,936.
Notísia relevante: KEJO realiza jogu amizade komemora masakre 12 Novembru
Jornalista: Sérgio da Cruz
Editór: Evaristo Soares Martins
