MS aloka milaun $ 10 iha 2023 atu redúz má nutrisaun iha Timor-Leste
DILI, 28 setembru 2022 (TATOLI) — Ministra Saúde, Odete Maria Freitas Belo, hateten orsamentu ba má nutrisaun ba tinan 2023, Ministériu Saúde aloka ona milaun $10 ho objetivu atu redúz má nutrisaun iha Timor-Leste.
“Prezidente Republika, José Ramos Horta preokupa má nutrisaun iha Timor-Leste tanba ne’e nia husu atu tau osan ba iha ne’eba, entaun nia ko’alia ne’e ba nia mandatu, nune’e mak ita tau osan milaun $50 ba tinan lima nian signifika kada tinan ita tenke tau milaun $ 10. Tuir loloos hahú iha tinan 2022 maibé labele tanba ita iha ona fulan klaran entaun orsamentu sira ne’e ami halo ami nia atividade sira balun ona entaun ami propoen ba tinan 2023 no orsamentu ne’e alokadu hamutuk milaun $ 10”, Ministra Saúde, Odete Maria Freitas Belo, hateten ba TATOLI iha Palásiu Governu, ohin.
Governante ne’e husu ba diretór sira iha Ministériu Saúde atu bele deskreve planu no programa sira, nune’e bele ajuda hodi reduz má nutrisaun iha Timorr-Leste.
“Orsamentu milaun $10 ne’e ba de’it programa nutrisaun tanba Prezidente Repúblika mós hakarak eleva departamentu nutrisaun ne’e sai ba diresaun, entaun ami nia jurídiku sira perapara no elabora servisu ida ne’e, espera hotuhotu lalais nune’e ami bele ba aprezenta iha Konsellu Ministru nune’e bele hatan ba Prezidente Repúblika nia proposta”, revela.
Aleinde ne’e, iha 2020, Ministériu Saúde liuhusi departamentu nutrisaun halo revizaun ba peskiza aihan nutrisaun ne’ebé rejista má nutrisaun aas iha munisípiu tolu hanesan Ainaro 60,3% Ermera 63,4% no Rejiaun Administrativu Espesial Oe-cusse Ambeno (RAEOA) 57,1%.
Tuir peskiza husi Ministériu Saúde, iha 2020, labarik tinan lima mai kraik hamutuk 47% sofre má nutrisaun krónika no raes badak iha Timor Leste.
Jornalsita : Felicidade Ximenes
Editór : Zezito Silva
