iklan

HEADLINE, SAÚDE

Xina apoia mákina lithotripsia no MRI ba HNGV

Xina apoia mákina lithotripsia no MRI ba HNGV

Primeiru-Ministru, Taur Matan Ruak, Embaxadór Xina iha Timor-Leste, Xiao Jianguo, Ministra Saúde, Odete Maria Freitas Belo akompañadu hosi médiku sira vizita sentru Liptotrípsia, iha Hospitál Nasionál Guido Valadares (HNGV), kuarta (28/09). Imajen Tatoli/Francisco Sony

DILI, 28 setembru 2022 (TATOLI) – Governu Repúblika Populár Xina apoia mákina lithotripsia no magnetic Resonance Imaging (MRI) ba Hospitál Nasionál Guido Valadares (HNGV) hodi halo tratamentu ba moras fatuk rins.

Embaixadór Xina iha Timor Leste, Xiao Jianguo, dehan Xina komprometidu apoia Timor-Leste durante tinan naruk iha área saúde nian.

”Durante Covid-19, Governu Xina la taka matan ba Timor-Leste maibé kontinua apoia vasina ba timoroan sira hodi kontra moras coronavirus’’, Xiao Jianguo, hateten bainhira iha nia diskursu iha ámbitu serimónia inagurasaun fasilidade lithotripsia no MRI iha HNGV, ohin.

Iha fatin hanesan, Xefe Governu, Taur Matan Ruak, agradese ba Governu Xina ne’ebe ajuda mákina hirak ne’e ho objetivu atu uza hodi atende ba pasiente sira iha Timor-Leste.

“Ha’u lori Governu nia naran agradese ba Governu Xina ne’ebé mak apoia ita liuliu mákina lithotripsia no MRI, atu nune’e ita nia médiku sira halo tratamentu ba pasiente sira ho moras fatuk rins ne’ebé mai halo tratamentu iha ne’e, apoiu ne’e mós antes ne’e iha período covid Xina mós atribui ekipamentu médiku no apoiu vasina ba Timor-Leste”, Primeiru Ministru Taur Matan Ruak dehan iha HNGV.

”Ohin testemuña tan aspetu ida iha nível koperasaun nian liuliu mákina ne’e hodi rezolve problema sira ne’ebé mak iha HNGV atu nune’e bele redúz ema moras sira ba rai liur no mós ho ekipamentu médiku sira bele prátika para bele fó atendimentu ba pasiente sira’, refere.

Primeiru-Ministru kompromete sei hadia HNGV liutan infraestrutura nian, nune’e bele bele assegura no garante tratamento ne’ebé efetivu no efisiénsia.

”Governu promete hodi hadia buat barak iha ospitál maibé prioridade dahuluk mak infraestrutura sira no ita sei hadia neneik hodi bele halo tratamentu moras sira iha ne’e’’ ‘Nia afirma.

Nune’e mós, Diretór Ezekutivu HNGV, Alito Soares, hateten inagurasaun ida ne’e ba sentru lithotripsia no MRI hodi halo tratamentu ba moras fatuk rins nian.

”Mákina lithotripsia ne’e atu halo tiru rahun fatuk rins sira iha ita nia isin tanba ne’e vantajen di’ak ba pasiente sira hodi alta lalais, entaun uza ida ne’e halo operasaun aberta ne’ebé di’ak,”Alito Soares informa.

Nune’e, mákina MRI atu halo diagnosa ba moras sira ne’ebé iha entaun ajuda tebes husi faze dahuluk, tanba ne’e Governu tenke aumenta tan hodi halo tratamentu pasiente sira iha rai laran.

Espesialista ba mákina ida ne’e daudaun ne’e mediku sira husi Xineza no fó ona formasaun ba pesoál saúde sira atu halo intervensaun ba moras sira ne’e.

Hahú 2017 pasiente sofre fatuk rins hamutuk 1.434, husi numeru ne’e 50 % husi mane no 45% husi feto no númeru ne’e ba idade produtivu husi 15 to’o 45.

”Husi númeru sira ne’e tratamentu iha rai laran no mos balun ita halo transferénsia ba rai liur’, katak.

Diretór Ezekutivu hato’o preokupasaun ba Primeiru-Ministru liuliu orsamentu durante ne’e seidauk kobre ba servisu esensiál sira.

“Ita presiza mós área fundamentál hodi tau atensaun no mós rekursu umanu liuliu espesialista sira atu kontinua sira nia estudu, atu nune’e bele redúz moras sira ne’e ba rai-liur’, konklui.

Jornalista : Felicidade Ximenes

Editór : Zezito Silva

 

 

iklan
iklan

Leave a Reply

iklan
error: Content is protected !!