Labarik feto adoloxente ho idade 12-16 sei simu suplementu alimentasaun
DILI, 29 setembru 2022 (TATOLI) – Ministériu Saúde (MS) no Ministériu Edukasaun Juventude no Desportu (MEJD) sei distribui suplementu alimentasaun ba labarik feto sira adoloxente ho idade 12 to’o 16 iha 2023. Programa ne’e pronúnsia liuhosi kampaña sensibilizasaun ne’ebé efetua iha salaun Kay Rala Xanana Gusmão, Ministériu Finansa, Aitarak-Laran.
MS no MEJD hamutuk ho Fundu Nasaun Unidas ba Labarik (UNICEF, sigla inglesh) no mós Governu Japaun iha Timor Leste halo sensibilizasaun kona-ba programa distribuisaun suplementu alimentasaun ba labarik feto adoloxente ho idade12 to’o16, hahú iha fevereiru 2023.
“Ita nafatin kontinua servisu maka’as hodi halo sensibilizasaun ba programa distribuisaun suplementu alimentasaun ba ita nia oan sira liuliu ho idade 12 to’o 16 iha nível nasionál tanba ne’e, ita hotu halo esforsu hodi bele realiza servisu ida ne’e. Hein katak ita hotu tenke kontribui ba meloramentu nutrisaun”, Diretór Interinu Prestasaun Saúde iha Ministériu Saúde, Nilton do Carmo da Silva, hateten iha nia diskursu iha ámbitu sensibilizasaun ba programa distribuisaun suplementu alimentasaun ba labarik feto adoloxente.
Nia revela, labarik sira nesesáriu tebes ho kondisaun ne’ebé nutriente liuhosi konsumu suplementu alimentasaun ho objetivu atu hadia nutrisaun.
“Labarik sira idade ho 12 ne’ebé mak hahú ona mestruasaun tenke konsumu suplementu alimentasaun atu bele fó nutrisaun ba ita nia oan sira ho tempu tuir mai”, Nilton do Carmo dehan.
Iha fatin hanesan, Diretór Nasionál Asaun Sosiál Eskolár hosi MEJD, Joaquin Martins, hateten dezenvolvimentu umanu la ses husi saúde komunidade nian tanba ema nia saúde depende ba hahan ne’ebé nutritivu hodi dezenvolve fíziku no mentál.
“Tuir matenek nain, hateten hahan implika ba dezenvolvimentu kakutak bainhira, hahan la kontein ho nutrisaun, tanba ne’e, presiza iha mudansa metabolizmu iha kakutak”, salienta.
Aliende defisiénsia nutriena bele kauza ba dezenvolvimentu isin no isin sei kiik bele implika negativa ba dezenvolvimentu nasaun nian.
Xefe Planeamentu Monitorizasaun Avaliasaun no Polítika Sosiál husi UNICEF, Emmanuelle Collet, informa MEJD ho MS nia kolaborasaun mak bele implementa programa suplementu alimentasaun ba labarik adoloxente.
“Ita hotu hatene katak husi idade ne’e kresimentu ne’ebé mak lalais ba labarik sira, entaun importante tebes ho suplementu ne’ebé mak atu ajuda sira nia atividade lorloron, nune’e mak UNICEF sei halo fornesimentu ba suplementu ida ne’e ba eskola sira. Ida ne’e hanesan mekanizmu ida atu prevene moras anemia”, Emmanuelle Collet dehan.
Tuir Emmanuelle, anemia nia sintoma mak halo ema kolen, la iha forsa atu ajuda labarik adoloxente sira atu ativu nafatin no halo sira nia atividade loroloron.
Representante Embaixada Japaun iha Timor Leste, Yamada Kazumi, dehan totál orsmentu ne’ebé Governu Japaun apoiu ba Governu Timor-Leste liuhusi UNICEF besik millaun tolu hodi aloka ba programa nutrisaun.
Jornalista : Felicidade Ximenes
Editór : Zezito Silva
